RELASIYON sa babaye ang nag-unang motibo nga gisusi sa kapulisan sa Isla sa Olango, Dakbayan sa Lapu-Lapu sa pagpusil patay sa usa ka konsehal sa Barangay Tungasan sa alas 8:45 sa gabii sa Dominggo, Mayo 8, 2022.
Sa pagkakaron, wa pa gikonsiderar sa kapulisan ang kalambigitan sa pulitika, matod ni Police Sr. Master Sergeant Erwin Suson, imbestigador sa Olango Police Station sa interbyu sa Superbalita Cebu sa Lunes, Mayo 9.
Si Suson niingon nga sa ilang background checking, dunay ka relasiyon nga mga babaye si konsehal Jose “Sadam” Quiros nga hayan usa niini o kabanay nasuko.
Apan iyang gitataw nga duna pay laing mga anggulo nga ilang gisubay sa pagkakaron.
“Ang motibo ron nga atong gilantaw nga anggulo kining parte sa kuan kaning naay mga report parte sa babaye,” matod ni Suson.
Ila usab nga nasayran nga tulo ang killers.
“Tulo base sa atong imbestigasiyon sa nakakita. Usa lookout, duha misud sa food park,” dugang ni Quiros.
Si Quiros nakig-estorya sa laing tawo atubangan sa Triponia's Food Park nga iya ni Brgy. Captain Triponia Abaya sa Tungasan dihang siya gipusil.
Ang gunman giingong nagsul-ob og yellow nga senina ug yellow nga kawo.
Sa pagsuwat ning taho, ilang gisubay ang mga dapit nga dunay closed circuit television (CCTV) camera nga hayan makatabang sa pag-ila sa killers.
Si Quiros niabot sa Santa Rosa Hospital mga alas 8:50 sa gabii kay duol ra sa dapit nga nahitaboan ug mga alas 9:48 gideklarar siya sa doctor nga patay na.
Matod ni Suson nga bisan dunay mga tawo atol sa hitabo, pipila lang ang nakasulti kay kadaghanan na shock atol sa pagpusil.
Sa una nilang nasayran dunay upat ka mga samad pinusilan si Quiros sa nagkadaiyang bahin sa iyang lawas, apan kompirmahon pa kini sa autopsy sa PNP Crime Lab.
Gikondena, ganti
Gikondena ni Lapu-Lapu City Mayor Junard “Ahong” Chan ang pagpatay ug nanawagan sa Philippine National Police (PNP) nga sulbaron dayon kini.
"As the city mayor, I cannot let this incident pass without taking action for the swift resolution of this case. I call on our Philippine National Police to quickly solve this matter. If it warrants, I call for the creation of a special task force for the PNP to solve this wanton disregard of life," matod niya.
“Isip amahan sa dakbayan, manawagan ko sa mga supporters sa nagkalainlaing pulitikanhong pundok nga magpabiling kalmado ug atong e-exercise ang atong katungod sa pag pili sa atong lider sa pamaagi nga hapsay ug limpyo,” dugang pa niya.
Nipahibawo usab siya nga mohatag og reward niadtong makahatag og impormasyon nga makatabang sa pagsulbad sa kaso.
“Mohatag sad ko og ganti sa kon kinsa man ang makahatag og tukma nga impormasyon nga makatabang sa pag sulbad sa kaso... Sa pamilya ni Kons. Sadam Quiros, dawata ang akong pahasubo ug ang saad nga kutob sa akong mahimo tabangan tamo nga ma kab-ot ang hustisya,” matod ni Chan.
Si Lapu-Lapu City lone congressional district Rep. ug kanhi Lapu-Lapu City mayor Paz Radaza, kinsa nidagan batok kang Chan karong piniliay, nitanyag og P300,000 isip reward money niadtong makatabang sa pag-ila sa gunman.
"Sadam, ayaw pagkatulga, ayaw pakan-a, ayaw tuguti nga maka-ikyas ang nagbuhat nimo ani. Hasula og maayo ang ilang kinabuhi hangtod sila mo surrender," nagkanayon si Radaza sa usa ka pamahayag.
Gihangyo usab niya ang PNP nga imbestigahon ang insidente.
"Nagbangutan ko uban sa akong pamilya sa kamatayon ni Konsehal Sadam ug ako maningkamot nga makab-ot ang hustisya para kang Kons. Sadam sa pinakadaling panahon," dugang ni Radaza.
Si Quiros aktibong tigpaluyo ni Radaza. (EHP/LMY/REV)