KARON adlawa atong ipakita ang husto nga paggamit sa atong katungod sa pagbotar o sa pagpili sa mga kandidato nga angayan modala sa renda sa atong panggamhanan, nga nagtangag na og trilyunes nga utang sa gawas. Atong pilian karon ang mga kandidato nga dunay katakos, integridad, ug husto nga kaalam sa pagka presidente, bise presidente, senador, kongresista, gobernador, bokal, mayor, ug mga konsehal.

Dili sad ta mahikalimot sa pagsunod sa health protocols sama sa pagsul-ob og face mask ug distansya sa matag tawo sa atong pagbotar kay kining Covid-19 Omicron variant nia pa sa atong dapit nagsuroy-suroy ug naa pay mga botante nga wala pa magpabakuna. Labaw sa tanan, dili nato ibaligya sa kantidad nga P500 o di ba P1,000 ang atong boto tungod kay usa ni ka sagrado nga katungod nga gitipigan sa atong Batakang Balaod.

Motuo man ta o dili, apan sa akong nasaksihan sa pipila na katuig nga nakabotar ko, ang usa sa mga hinungdan nga bisan pa sa kabahandianon sa atong nasud sa atong natural nga kahinguhaan, pordoy lang gihapon ta tungod kay kadaghanan kanato gibaligya ang katungod sa pabotar ug ang pulitiko nga namalit dili na motrabaho alang sa kaayohan sa tanan.

Mosayo ta og botar karon aron makalikay ta sa kinabag-an mga botante. Ato sad likayan ang estorya nga dala og pagpangampanya kay homana ang panahon alang sa pangampanya ug basin mahimo pa unya ni nga pabilo sa lalis. Kadaghanan ra ba sa mga lunod-patay nga lumalaban kay mas isog pa kay sa ilang kandidato nga gisuportahan.

Mangaliya sad ta sa kahitas-an nga wala untay mga dautan nga mahitabo sa tibuok nasud ning adlaw sa atong pagbotar. Pirmi man ni ang kainit sa atong pulitika tungod kay dunay mga kandidato nga di makadawat og kapildihan. Gani, daghan na ang mga dapit nga gipaubos sa Comelec control.

Ang dili sad nako masabtan mao ang mga problema sa Comelec nga pirmi masugatan kanang magkaduol ang adlaw sa piliay. Sa miaging mga adlaw, atong nahibaw-an nga dunay mga VCM (vote counting machine) nga dautan dihang gipaandar.

Ang piliay dinhi sa atong nasud usa ra matag tolo ka tuig apan ning atong Comelec, morag wa magtrabaho sa duha ka tuig sa di pa ang eleksyon. Ang problema sa Comelec, morag hilanat nga kalit lang motunga kon hapit na ang adlaw sa pagbotar. Bisan kaniadto nga mano-mano pa ang pagboto ug ang pagbasa ug ihap sa boto, naa gihapon mga problema sa nga masugatan.

Misamot na karon ang problema sa Comelec nga electronic na ang pamaagi sa pagbotar ingon man sa pag-ihap sa boto sa matag kandidato. Gani, mao ni usa sa mga basihan unya sa protesta sa mga mapildi sa eleksyon tungod kay magduda sila nga gitikas ang boto nga alang kanila tungod sa madudahan nga sistema nga gigamit sa Comelec.

Apan bisan pa sa mga problema, nga matud pa sa Comelec dili makaapekto sa piliay ingon man sa resulta niini, manghinaut usab ta nga limpyo ug hapsay kining atong general elections karon.