Magtukod og skate ug family park si Talisay City Mayor Gerald Anthony ‘Samsam’ Gullas.
Ang park anha niya ipabutang sa hawanan sa tugkaran sa city hall sa Siyudad.
Matod ni Gullas nga iyang nakita ang nagkadakong komunidad sa skateboarding di lang sa dakbayan sa Talisay, kon di sa tibuok Sugbo.
Matod niya nga kon kini matuman na, mamahimong makabansay ang mga Talisaynon ug uban pang skateboarders sa ubang dapit sa Sugbo.
Iyang nakita nga ang mga skateboarder anha lang sa mga karsada ug sidewalk nagbansay.
Iyang nalantawan nga kaya kaayo sa mga Sugboanon nga makigkompetensiya sa tibuok kalibutan, sama kang Margie Didal busa angay nga dunay skatepark.
“But once our city converts our plaza into a skate and family park, this could become an outlet for future athletes to become better at their sport. Moingon gyud ko nga”future athlete” because skateboarding has become an Olympic sport. Filipinos, particularly Cebuanos like Margie Didal have dominated in the world stage,” matod ni Gullas sa iyang social media post.
Aron kini matuman, iyang gipadesinyo ang sikat sa kalibutan nga Cebuano designer, Kenneth Cobonpue, samtang si Olympic skateboarding coach Dani Bautista maoy mogama sa obstacles nga gikinahanglan sa skatepark.
Gawas sa skatepark, pamutangan usab kini og coffee shop, mga kan-anan, food court stalls ug luna diin mahimong maka picnic ang mga pamilya.
Kon matuman ang plano ni Gullas, ikaduha na kini nga skatepark sa Sugbo human ang dakbayan sa Lapu-Lapu nakatukod niadtong 2014 sa panahon pa ni lone district Rep. Paz Radaza dihang siya pa ang mayor.