Gihulagway sa kapulisan ug sa Commission on Elections (Comelec) nga malinawon ang piniliay sa Central Visayas bisan sa nanggawas nga report nga adunay mga insidente sa pagpamusil sa probinsya sa Sugbo ug dakbayan sa Lapu-Lapu.

Nabantayan usab sa Comelec nga daghan ang mga botante kay kaadlawon pa lang, duna nay mga naglinya gawas sa polling precincts. Matod ni Police Brigadier General Roque Eduardo Vega, hepe sa Police Regional Office 7, atol sa joint press conference, sa Comelec nga wala sila nakatala og insidente nga may kalabutan sa eleksiyon gikan alas 6 sa buntag hangtod sa alas 11:30 sa buntag base sa nakuha nga report gikan sa Regional Election Monitoring Action Center (REMAC 7).

Si Police Lieutenant Colonel Leoncio Baliguat Jr., deputy chief sa Regional Investigation and Detective Management Division (RIDMB 7), nagkanayon nga ang nahitabong mga pagpamusil sa isla sa Olango, dakbayan sa Lapu-Lapu nga niresulta sa kamatayon sa usa ka konsehal walay kalabutan sa eleksiyon.

Matod ni Baliguat nga personal ang motibo sa pagpamusil, diin duna na silay gitumbok nga mga suspek samtang sa San Fernando wala pa nila masayri kinsa ang mga biktima ug kinsa usab ang mga responsabli. Ang kapulisan sa San Fernando nihulagway sa insidente nga “shooting incident” nga way labot sa eleksiyon. (Lahi nga estorya sa pahina 4).

“As far as tagging as suspected election related incident is concern, it could not still be tag as such, considering that in tagging the same the victim should be a candidate, an election official, a supporter and a direct family member of the candidate,” matod ni Baliguat.

TAKDONG NAKAABLI

Samtang giangkon ni manlalaban Dennis Ausan, director sa Commission on Elections (Comelec) nga sa 8,129 ka clustered precincts sa upat ka probinsya, malampuson kini nga nakaabli sa gitakda nga oras nga mao ang alas 6 sa buntag.