Wa pa gani motapos ang kampanya, gabaha na ang kwarta nga gipanghatag sa mga kandidato ngadto sa mga botante. Nanghatod na ang mga lider sa kodigo nga naa na ang presinto kon asa ka mobotar ug gisukipan na og kwarta.
Niadtong Dominggo, nagkapuliki ang mga botante sa pagdawat sa salapi kay halos tanang mga kandidato nanghatag ilabi na kadtong pwerting sikita ang panagsangka. Apan naay mga dapit nga wa silay nadawat kay naa may kaatbang ang lig-on nga grupo apan klaro kaayo nga di makadaog.
Ang ubang mga grupo pila pa lang gani ka semana sa wa pa ang eleksiyon nangita nag mga banko aron sila makapasinsiyo sa ilang giandam nga minilyon nga maoy ipanghatag nila sa mga botante. Ang pagpanghatag og salapi ug pagpamalit sa mga botante nahimo na nga parte sa matag eleksiyon sa Pilipinas.
Modawat ra usab ang mga botante kon dunay idunol nila nga salapi. Gani ang uban nako nga mga kaila naghisgot nga makapalit na silag usa ka sako nga bugas sa ilang nadawat nga di na sila magproblema sud sa usa ka buwan ug sud-an na lang ang ilang pangitaon.
Ang ubang botante ningpadayag nga modawat sila og salapi kay matod pa iya kini sa katawhan apan gikurakot sa ubang mga pulitiko samtang anaa sa gobyerno busa angayan lang dawaton. Sa wala pa ang kampanya adunay kandidato nga midagan sa pagka-presidente namahayag nga kon dunay manghatag og kwarta atol sa eleksiyon dawaton, apan ang gilitok sa ilang konsensiya maoy botaran.
Apan dakong kalapasan kini sa Section 261 (a) sa Batas Pambansa Bilang 881 nga gitawag og Omnibus Election Code. Kadtong makombikto kay namalit ug gibaligya ilang buto silutan sa pagkapriso nga di mominus sa usa ka tuig apan di mosobra sa unom ka tuig unya walay probation. Ang kandidato nga mahukman nga sad-an di na makahupot og pwesto sa gobyerno ug di na usab makabotar unya pamultahon sa di mominus P10,000.
Ang Comelec adunay nadawat nga mga reklamo sa namalit og buto ug usa niini gikonsiderar na nga kaso sa vote buying.
Angay na nga istriktong ipatuman kini nga balaod kay alkanse ang mga kandidato nga kwalipikado ug angay apan di mapili kay wa may salapi nga mahatag sa mga botante. Kita sad mga botante bisan nahibawo ta nga supak ni sa balaod padayon tang nanawat hinungdan nga ang uban nagtuo nga legal ra ang ilang gibuhat. (josephelvirtubilan@gmail.com)