PATAY nang niabot sa tambalanan ang usa ka 72 anyos nga mag-uuma nga giatake sa kasingkasing sa iyang pagbotar sud sa usa ka presinto sa Biliran Central School, Barangay San Roque, Biliran sa mga alas 9:25 sa Lunes sa buntag, Mayo 9, 2022.
Sa taho sa Police Regional Office (PRO)-Eastern Visayas, ang namatay giila nga si Miguel T. Corpin, 72, taga sityo Lumbia, Barangay San Roque.
Si Corpin nibotar sa presinto diin siya na-assign dihang kalit lang siyang nawad-an sa panimuot.
Dali siyang gitabang ug gidala sa standby medical team ngadto sa Biliran Municipal Health Office apan gibalhin gilayon sa Biliran Provincial Hospital alang sa dinaliang pagtambal.
Apan dideklarar siya ni Dr. Alvin Penaflor nga dead on arrival sa mga alas 9:38 sa buntag.
Matod sa doctor nga ang posibleng hinungdan sa kamatayon mao ang “acute coronary syndrome,” kun atake sa kasingkasing. (REV)