Mikabat ngadto sa 52 ka batan-ong mga basketbolista ang migradwar sa unang level sa Tubu Master Basketball Camp nga gipahigayon sa barangay Balabagon covered court, lungsod sa Moalboal, Cebu.
Inabagan sa Barangay officials ug mga sakop sa Sangguniang Kabataan, ang maong training camp gisugdan niadtong Abril 11, 2022 ug nahuman niadtong Dominggo, Mayo 8, 2022 ubos sa pagdumala ni kanhi PBA player Renato “Coach Butchoy” Alforque.
Ang mga partisipante, nga nagpangidaron og siyete ngadto sa 19 anyos, gitudloan sa basic fundamentals sa basketball sama sa ball handling, passing, shooting, defense, footworks ug dribbling.
“Duna ta’y second level nga magsugod sa unang semana sa Hunyo. Duna ni continuity sa first level,” matod ni Alforque, kinsa produkto sa University of the Visayas Green Lancers ug nakaduwa sa Tanduay Rhum sa Philippine Basketball Associaton (PBA).
Sa registration fee nga P3,000, ang mga estudyante aduna nay libre nga upper jersey ug bola sa basketball.
Ang tag-iya sa Tubo Master Construction and Services nga si Rodolfo “Dolfox” Borja maoy personal nga nitambong ug nihatag sa mga pasidungog atol sa awarding rites.