Haros gyod sama sa kamunggay. Maghisgot ta sa bag-o pa lang nahuman nga piniliay sa Bohol. Nahuman na ang piniliay kay kaadlawon pa sa Martes, Mayo 10, miangkon na si Gov. Art Yap sa iyang kapildihan ug nipahalipay sa nakadaog bisan kon wala pa nakompleto ang canvassing.
Dako na kaayo ang abante ni Cong. Aris Aumentado batok ni Gov. Yap. Dako na sab kaayo ang abante sa kauban ni Cong. Aris nga si BM Victor Balite batok kang kasamtangan nga Bise Gobernador Rene Relampagos.
Nagpasabot kini nga kuyog pirmi ang duha, si Aumentado ug si Balite, sa ilang pagsulbong batok sa ilang mga kontra.
* * *
Dili na lang ta maghisgot og kwarta.Maghisgot na lang kita sa nahitabo gyod. Nganong napildi man si Art Yap ni Aris Aumentado? Ug nganong napildi man si Rene Relampagos ni Victor Balite?
Kon imong huna-hunaon, mga incumbent sila si Yap ug Relampagos. Dako kaayo kining pabor, labi na kay gigamit nila ang tanang magamit sa Kapitolyo, apil na ang mga ayuda sa national agencies ug provincial offices, apil na ang mga daghan kaayong casuals.
Ikaduha, gituhoan nga daghan kaayo’g kwarta si Art Yap ug Rene Relampagos. Daghan ang nagtuo nga kon kwartahay lang ang basehan, di gyod ni sila mapildi.
So nganong napildi man?
Sa akong pagtuo, nipatigbabaw gyod ang hukom sa kadaghanan sa mga Bol-anon nga pulihan o ilisan na sila si Yap ug Relampagos bisan pa sa mga mehoras nga gigamit ni Yap.
Dunay lungsod nga walay mayor si Aumentado, kay ang kasamtangan nga mayor ug bise mayor kay mga kaalyado man ni Yap. Pero ang resulta, gilubong sila si Yap ug Relampagos.
Sa mga lugar nga gitawag og balwarte ni Aumentado, migawas nga gilubong pod si Yap ug Relampagos sa mga boto ni Aumentado ug Balite.
Ikaduha, dako kaayo og gikatabang ang social media sama sa Facebook sa kampanya batok ni Yap ug Relampagos. Tanang kwestiyonable nga mga gipanghimo nila Art Yap ug Relampagos mogawas dayon sa Facebook ug tabangan dayon og komentaryo. Makapagusto og batikos ang katawhan tungod kay libre man sila mosulat.
Gani, kadtong bag-ong trahedya sa Loay, Bohol diin nahugno ang tulay ug pipila ka mga tawo ang namatay, nahimo sab nga laing batikos batok ni Yap.
Ikatulo, mipabati gyod ang katawhan sa dako nilang kasagmuyo ug kasuko sa gihimo ni Art Yap ug Rene Relampagos panahon sa istrikto nga protocol sa Covid diin daghan kaayong mga Bol-anon ang wala makapauli tungod sa kaistrikto sa mga palisiya nila ni Yap ug Relampagos. Wa gyod makalimot ang katawhan ug nagdumot sila ni Yap.
Miabot gyod ang panahon nga nakabalos sila pinaagi sa ilang mga boto.
* * *
Wa magsilbi ang kalit nga pagsulod ni Yap sa kampo ni BBM. Wa pod magsilbi ang iyang palakaw nga kaalyado niya si Inday Sara. Way epekto kini kay nasayod ang katawhan nga abtik pas kilat kini si Yap nga magbalhinbalhin og partido, depende lang sa unsay makapabor kaniya.
Sa miaging piniliay, midaog siya batok ni Toloy Evasco tungod kay dihay usa ka dakong opisiyal nga iyang gigamit batok kang Evasco. Ang maong opisiyal, matod pa, gikakontra ni Evasco ug tungod niini, wala kaayo magamit ni Evasco ang popularidad ni Presidente Rodrigo Roa Duterte (PRRD) aron masungkit ang kadaugan.