Pagpatay sa konsehal 'may labot' sa eleksiyon

GAHUWAT: Mao kining dapita nga giingong diin nag-estambay ang driver sa get-away nga motorsiklo nga gisakyan sa pagsibat sa duha ka killers ni brgy. konsehal Jose ‘Sadam’ Quiros. / Tampo ni TETETH MATA
GAHUWAT: Mao kining dapita nga giingong diin nag-estambay ang driver sa get-away nga motorsiklo nga gisakyan sa pagsibat sa duha ka killers ni brgy. konsehal Jose ‘Sadam’ Quiros. / Tampo ni TETETH MATA

Di motuo ang kabanay ug kahigalaan ni Olango island, Tungasan brgy. konsehal Jose “Sadam” Quiros nga babaye ang hinungdan sa pagpatay kaniya niadtong gabii sa Mayo 8.

Way karelasiyon si Quiros ning nanglabay nga mga buwan samtang ang iyang duha ka mga anak nagpanuigon na og 5 ug 3 anyos.

May kalabutan sa eleksiyon ang ilang pagtuo nga motibo sa pagpatay sa konsehal.

Mga ngan sa mga tinubdan gipugngan sa Superbalita Cebu tungod sa ilang hangyo bugti sa ilang pagpa interbyu.

“Kon babaye pa, niadto ra unta na siya gibirahan,” matod ni Jonie, uyoan ni Quiros nga nahinabi sa Superbalita Cebu sa Mayo 10, pinaagi sa cell phone.

Matod niya nga sa buntag sa Mayo 8, ang iyang pag-umangkon dunay gikalalis nga tawo usab sa usa ka pulitiko.

Si Loloy (di tinuod nga ngan), kinsa diha atol sa hitabo, niingon nga ang ,lalis may kalabot sa luna nga butangan og tolda.

Ang tolda pasilungan sa mga botante. Kay nauna man si Quiros sa paglimpyo sa dapit, nagkalalis sila sa mao nga tawo, kinsa niinsister nga iya nang naandan nga nahimutangan ang dapit kada eleksiyon.

Apan giklaro ni Loloy nga wa siya namasangil sa mao nga tawo, apan awhag nila sa kapulisan sa Station 1 sa Lapu-Lapu City Police Office (LCPO) nga iapil kini pag-imbestigar.

Si Loloy nibutyag nga niadtong Mayo 5, dunay mga van nga nangabot sa Olango, diin dunay pipila ka mga sakay nangutana kabahin kang Quiros.

Matod ni Loloy nga kadudahan ang mao nga mga tawo.

Ang Superbalita Cebu nakahinabi og duha ka mga saksi nga nakakita atol sa panghitabo nga pulos nangangkon nga wa sila mahinabi sa mga pulis.

Usa ka saksi sa krimen nisulti usab sa Superbalita Cebu nga sukad sa pagkahitabo sa krimen niadtong Dominggo sa gabii, way pulis nga niduaw kanila aron unta mainterbyu.

KILLERS

Si Gali (di tinuod nga ngan) niingon nga diha siya sulod sa Triponia’s Food Park sa Brgy. Tungasan atol sa hitabo.

Duha ka mga lalaki nanulod sa food park nga kinoral. Ang usa nagsul-ob og yellow nga sapot, pution ug taas samtang ang kuyog mubo, nagsul-ob og blue nga senina, itumon og pamanit.

Ang duha pulos nagkawo ug naglakaw nga kalma padung sa sulod.

“Ningduol na sila ni Sadam. Nya niibot og armas ang kadtong ga-yellow. Gatuo kong komedya ra kay komedyante man na si Sadam,” matod ni Gali.

Nakurat na lang siya dihang gipusil sa mao nga tawo si Quiros makaduha ka mga higayon.

Nakit-an na lang niya ang konsehal nga natumba na.

Dali silang nanago tungod sa kahadlok ug pagkataudtaud laing duha ka mga buto ang iyang nadunggan.

Siya nagtuo nga ang mubo nga gunman maoy nitiwas pagpusil kang Quiros.

Kalma rang nanglakaw ang duha ka mga gunman padung sa gawas diin dunay usa ka motorsiklo nga naghuwat sa unahan nga gimaneho og laing tawo.

Laing saksi niingon nga nipalit siya og softdrink sa tindahan sa park ug ningduol na siya kang kang Quiros, kinsa nakig-estorya sa duha ka mga retiradong pulis.

Apan sa kalit lang usa sa duha ka mga tawo nga ningduol kang Quiros namusil.

“Buanga nimo, Dam,” kutlo ni Bernie (di tinuod nga ngan) sa sulti sa gunman sa dayong pusil kang Quiros.

Wa siya makaklaro sa dagway sa duha kay gawas nga nagkawo, ngitngit usab ang dapit diin sila nag-estoryahanay.

Sa iyang kahadlok nipasalipod siya busa wa na siya kakita diin padung ang mga gunman.

GIPLANO

Matod ni Gali nga ang pagpatay ni Quiros giplano nang daan. Siya niingon nga ang mga killer didto nagtambayan sa kilid sa habig sa Bussbar, nga atbang lang sa food park.

Matod niya nga ang motorsiklo didto naghuwat daplin sa karsada tungod sa power plant.

“Kadto didto segurado gyud nga naay mga tawo nga nakakita sa duha (killers). Didto man gatambay ang motor,” dugang ni Gali.

Nahibung sila kon nganong ang kapulisan sa Olango island diretsong nitumbok nga babaye ang hinungdan sa pagpatay sa konsehal.

Ang kapulisan nisalikway sa pulitika ug eleksiyon isip motibo sa pagpatay.

Si Police Sr. Master Sergeant Erwin, imbestigador sa kaso nga gitawgan sa Superbalita Cebu alang sa iyang reaksiyon, wa nitubag sa tawag.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph