NIKANAWKANAW si kanhi senador Ferdinand "Bongbong" Marcos Jr. human milya-milyang misutoy sa nahitabong "unofficial vote count" sugod pa niadtong Lunes, Mayo 9, 2022, sa presidential election.
Uban sa 80 porsiyento nga mga boto nga natali, si Marcos duna nay 25.9 milyon, mas layo sa ikaduhang nagsunod kaniya nga si kasamtangang Vice President Leni Robredo, nga dunay 12.3 milyon.
Ang presidential race frontrunner, Marcos Jr., nagpadayag na og pasalamat ngadto sa mga tawo nga miboto kaniya bisan og iyang giangkon nga wala pa mahuman ang iniphanay.
Ang modaug sa eleksiyon molingkod sa Hunyo 30 alang sa unom ka tuig nga termino isip lider sa Pilipinas nga naigo og maayo sa coronavirus disease (Covid-19) ug mga lockdowns.
Apan ang pagpanguna ni Marcos Jr. sa "unofficial count" sa mga boto gisugat og mga rali sa mga progresibong grupo aron iprotesta ang giingong halapad nga anomaliya sa eleksiyon. Dinhi lang sa Siyudad sa Davao, grupo sa kabatan-onan ug mga miyembro sa nagkadaiyang progresibong sektor nagrali sa Freedom Park ning siyudad kagahapon sa hapon.
Samtang si Davao City Mayor Sara Duterte-Carpio, kinsa ka-tandem ni Marcos Jr. sa pagka-bise presidente, nag-una sab sa unofficial counting. Ang ilang panag-uban naghiusa sa mga boto gikan sa northern ug southern political strongholds, nga nagpalapad pa sa ilang tsansa.
Sa pikas bahin, midawat na sab si Labor leader Leody de Guzman sa iyang kapildihan gikan sa tigi sa pagka-presidente Martes, uban sa 97 porsiyento nga election returns nga naproseso na sulod sa 24 oras human ang pagboto alang sa nasudnon ug lokal nga eleksiyon.
Sa pahayag, si De Guzman, kinsa naa sa ikawalo sukad alas 3 sa hapon niadtong Martes, Mayo 10, nagsulti nga samtang nidawat sa iyang kapildihan, nga ang Commission on Elections (Comelec), kinahanglan nga manubag sa daghang mga reklamo sa iregularidad atol sa eleksiyon.
"Nananawagan tayo sa Comelec na imbestigahan ang mga naiulat na insidente," awhag ni De Guzman.
Laing presidential candidate, Senator Panfilo Lacson, kinsa naa sa ikalimang puwesto base sa inisyal nga canvassing, nagsulti nga panahon na nga mouli na siya sa ilang panimalay ug mag-alagad sa iyang pamilya human nga nagserbisyo sa publiko sud sa 50 ka tuig.
"I’m going home. After being away too long looking after the needs of other people, it is time to serve my family for a change," matud niya.
"Enjoying peace and quiet in these challenging times will probably be my life’s greatest reward," dugang pa niya.
Apil nga mi-concede mao si presidential candidate Isko Moreno ug nanawagan nga maghiusa ubos sa bag-ong motimon sa renda sa panggamhanan.
Samtang ang pares ni Lacson, Senate President Vicente Sotto III, nagsulti sab nga kinasing-kasing niyang gidawat ang pagbuot sa katawhan.
"The people have made their choice. I accept the will of the People. We presented an alternative for a better system in governance and politics but the electorate had their minds conditioned elsewhere. Our word of honor and loyalty are of far greater importance than an election win. I am glad that I did not yield to any political pressure to change my principles and kept my integrity intact till the end," matud niya.
Nagpasalamat sab si Sotto sa iyang mga suporter. (Uban sa taho sa Sunnex)