Ang Libreng Sakay sa Land Transportation Franchising and Regulatory Board (LTFRB-7) ilawom sa programang service contracting nakaserbisyo na og minilyon ka mga tawo sa miaging usa ka buwan sa tibuok Central Visayas.
Base sa talaan sa LTFRB 7 gikan niadtong Abril 11 hangtod niadtong Mayo 10, niabot na og 4,036,574 ka mga tawo ang nakapahimulos sa libreng sakay, mayoriya niini gikan sa Sugbo.
Si Regional Director Eduardo Montealto Jr. nagkanayon modaghan pa ang nakapahimulos sa maong programa sanglit magpadayon pa kini hangtod nga mahurot ang pundo nga gigahin sa Department of Transportation (DOTr) aron matabangan ang mga driver ug operators diin ang riding public makabenepisiyo.
“The Service Contracting Program intends to assist operators and drivers whose livelihoods were affected by the COVID-19 pandemic and the increasing price of fuel. Through the program, commuters are also given service with efficient and safe public transportation,” padayag ni Montealto sa ilang official Facebook page sa LTFRB 7.
Ang LTFRB sa Central Visayas adunay P459 milyones nga pundo alang sa programa.
Ning programa, ang ahensiya sa gobyerno na maoy mobayad sa matag kilometrahi nga mabiyahe sa mga bus, PUJ, ug ubang akreditadong public utility vehicle, kinsang mga operator ningpirma og kontrata tali sa LTFRB 7.
Ang national government ubos sa budget sa LTFRB, adunay P7 bilyones alang sa service contracting nga gitawag ni Secretary Art Tugade og “Libreng Sakay” alang karong tuiga, diin ang dul-an sa P500 milyunes gihatag ngadto sa LTFRB 7.