Aron pagsanong sa mga hangyo, ang PowerPlay modugang usab og laing basketball training camp sa duha ka managlahing mga dapit sa mga dakbayan sa Lapu-Lapu ug Mandaue.
Sugod kagahapon, Mayo 12, 2022, ang Powerplay, nga ubos sa pagdumala ni kanhi PBA star Larry Villanil, miabli sa ilang training camp sa Pusok Basketball court nga anaa nahimutang ubos sa 2nd bridge sa Lapu-Lapu.
Ang sessions ipahigayon matag Martes, Huwebes ug Sabado sa alas 10:00 sa buntag hangtod na sa alas 12:00 sa udto.
Sa Mayo 16, 2022, Lunes, motapon kini sa Ibabao, Estancia Gym sa Mandaue City.
Kini himuon matag alas 2:00 sa hapon hangtod na sa alas 4:00 sa Lunes, Miyerkules ug Biyernes.
Ang tanang mga partisipante adunay libreng usa ka upper jersey, usa ka short pants ug bola sa Powerplay.
Itudlo sa maong training camp ang basic fundamentals sa dribbling, shooting, defense, passing ug uban pa.
Gipahibawo ni Villanil nga limitado lang ang slots sa nahisgutan nga camp ug ilang ipatuman ang first-come, first-served nga pamaagi.
Kini gitumong aron paghashas sa mga batan-on nga adunay abilidad ug potensiyal nga mamahimong sikat nga basketbolista sa nasod.
Ang Powerplay nga nagsugod dul-an sa 20 na ka tuig ang nakalabay, nakaumol na og mga inilang magdudula nga anaa na sa mga dagkong liga karon.
Alang sa mga interesado, mahimong mokontak lang sa 0923-565-6206 alang sa dugang mga detalye.