Nahuman na ang botasiyon. Daghan nang mga mananaug nga naproklamar sa Commission on Elections (Comelec). Atong nakita nga husto ang resulta sa nagkalainlaing mga survey labi na ang sa Pulse Asia, Social Weather Stations (SWS), Octa Research ug uban pa. Sayop ang pangagpas ni Romulo Virola, kanhi secretary general, National Statistical Coordination Board. Ang iyang gituhoan nga si Leni Robredo makakuha og 55% sa mga botos samtang si Bongbong Marcos 45% lang.

Samtang ang mga kandidato sa pagka senador nga modaug sumala sa mga survey natinuod apan wala sila magtuo nga si Robin Padilla maoy mag-una. Daghang mga maayong kandidato sa pagka senador ang wala makadaug tungod kay daghan kaayong mga inila nga milansar pagka senador karong tuiga. Sayang!

* * *

Sa Cebu City, dakog diperensiya ang nahimo sa kandidatura ni Konsehal David Tumulak nga milansar pagka mayor. Nianang pagka-alas 10:17 sa gabii niadtong adlaw mismo sa eleksiyon nakakuha si Tumulak og 116,760 botos samtang si Margot Osmeña adunay 164,816 botos. Nag-una si Mike Rama sa 194,583 botos. Ang labaw ni Rama kang Osmeña 29,767 botos lamang. Ang botos ni Tumulak dili hinuon nato matagna kon asa padung kon wa pa siya molansar. Samtang sa pagka-bise mayor si Konsehal Raymond Garcia nakakuha og 230,685 botos samtang si Konsehal Franklyn Ong mikuha lamang og 181,763 botos. Si Bimbo Fernandez nakakuha og 30,617.

Sa pagka konsehal morag usa lamang ang molusot sa BO-PK sa South District samtang tulo lamang sa North District. Sa ato pa magpabiling minoriya ang BOPK sa konseho. Sa pagka kongresista midaug si Konsehal Edu Rama (Barug) sa South District samtang North District gidaug ni Cutie del Mar (BOPK). Daghang nagtuo nga midaug ang Barug tungod sa ilang pagpaluyo sa BBM – Sara tandem. Unsa kahay ikasulti ni Mayor Mike niini?

* * *

Matapus na unta ang tanang panag kumpitinsiya, away, pustaanay ug walay tingganay sa mga higala ug bisan gani sa mga sakop sa pamilya. Hinaut pang kalimtan na kining negatibong taras hinunoa sagupon ang naandang kasuod ug pagtinabangay. Atong paluyohan ang mga mananaug alang sa kaayuhan sa atong nasud ug sa mga Pilipino. Mahimo man kining gitawag og critical collaboration. Atong paluyohan ang makahatag og kaayuhan sa kadaghanan samtang supakon ang atong gituhoan nga makadaut sa katawhan.

Dako kaayo ang kinahanglang buhaton alang sa atong ekonomiya nga mitibugsok tungod sa Covid 19 pandemic. Hapit P13 trilliones ang atong utang nga angay pagabayran. Daghang mga infrastructure project sa gobiyerno nga nangaguba tungod sa bagyo ug ubang katalagman. Dili sayon alang sa mosunod nga pangagamhanan ang pagsulbad niining maong mga problema sa nasud. Nagkinahanglan sila sa panabang sa katawhan. (msr1144@yahoo.com)