Dakong kahinangop ang gibati sa kadagkoan sa kapulisan sa siyudad sa Sugbo sa pamahayag sa bag-ong giproklamar nga si Mayor Michael Rama nga iyang suportahan ang mga programa sa kapulisan aron mabalik ang imahen niini nga Cebu’s finest PNP.

Matod ni Police Lieutenant Colonel Maria Theresa Macatangay, information officer sa Cebu City Police Office (CCPO), ilang gikalipay ang pasalig sa mayor ug siya nanghinaot nga mapatuman kini sa pamunoan ni Rama.

Nipasalig si Macatangay nga ang kapulisan padayon sa ilang makugihong pagpatuman sa kahapsay ug kalinaw sa dakbayan lakip na ang siguridad sa katawhan ug pagsulbad sa krimen nga hinimoan sa mga menor de edad.

Usa sa mga gipahibawo ni Rama ang pag-ayo sa nangaguba nga mga CCTV camera sa kadalanan tungod sa pag-igo sa bagyong Odette (Rai) sa Sugbo nga nidanyos sa mga kagamitan sa Dakbayan.

Gikalipay kini sa kapulisan sanglit dako og tabang ang mga CCTV camera sa pagsulbad sa mga krimen diha sa kadalanan pinaagi sa pag-ila kon kinsa ang naghimo niini.

“Dako kaayo na siya og ikatabang sa amoang pagsulbad sa mga krimen ug deterrence sad na siya sa mga posibling krimen. Nindot sad na nga contribution sa atoa nga gi-envision nga mahimo ang Cebu City Smart City,” matod ni Macatangay.

Pinaagi sa suporta ni Rama sa kapulisan, gilauman sa CCPO nga maaprobahan na sa National Police Commission (Napolcom) ang ilang programa sa pagtukod og dugang police station sa bukirang barangay sa dakbayan sa Sugbo.

Una nang nitukod ang CCPO og community police precinct sa Barangay Adlaon ug Barangay Malubog aron matubag ang problema sa kriminalidad sa bukid.

Matod ni Macatangay nga tungod sa nagkadaghan na nga mga residente sa bukid ug nagkataas nga turista nga mobisita sa mga suroyanan sa bukirang dapit sa dakbayan, kinahanglan na nga mag-umol og laing duha ka police stations.

Una nang nisaad ang Kagamhanan sa Dakbayan sa Sugbo nga mohatag silag suporta sama sa pagpalit og mga kagamitan sa bag-ong tukoron nga police station ug dugang pundo alang sa sakyanan ug gasoline allowance niini.