ANG WALA paghugas og plato maoy hinungdan sa away sa mag-tiayon nga miresulta sa paglayas sa asawa sa usa ka barangay sa Montevista, Davao de Oro alas 7:00 sa gabii, Martes, Mayo 10, 2022.
Kini ang nasayran gikan sa usa ka alyas Jonas, 36, kinsa molupyo sa nahisgutang barangay human mahinabi ning tigsuwat sa usa publikong terminal sa Compostela alas 3:00 sa hapon, Miyerkules, Mayo 11, 2022.
Gibutyag ni alyas Jonas nga kauban siya sa iyang kumpare nga si alyas Meloy nga miuli sa balay gikan sa trabaho.
Apan maoy naabtan ni Meloy ang asawa nga nagpunay og kuti-kuti sa Facebook gamit ang selpon ug wa pa makalung-ag og panihapon.
Tungod niini, nasuko ang bana sanglit gigutom gikan sa trabahong pagpamanday ug misamot pa ang kasuko dihang nakita sa lababo ang nagtipun-og nga mga platong hugason nga wa mahugasi nga gikan pa sa paglakaw niini sayo sa buntag.
Nagkalalis ang magtiayon ug miabot sa punto nga namutos ang asawa sa iyang mga sinina ug milayas taliwala sa kagabhion. Tungod niini, si alyas Jonas ug ang iyang kumpare wala na hinuon makapanihapon.
Sumala pa nga ang bana daling mikanaug sa ilang balay ug giapas ang iyang asawa didto sa pampublikong terminal sa lungsod kinsa desidido nang mouli ngadto sa iyang ginikanan sa siyudad sa Panabo.
Sa pagsuwat ning balita, wa pa masayri kung naabtan ba sa bana ang iyang asawa sa terminal niadtong higayona.