USA KA lider sa New People’s Army (NPA), kinsa adunay patong sa ulo nga P5.4-milyon, giingong miunay og patay sa iyang kauban ug gilubong sa New Bataan, Davao de Oro niadtong Abril 2022.
Sa suwat pahayag gikan sa 10th Infantry Division, ang kanhi sakop sa NPA nga si alyas Vina nagtug-an nga ang lider sa NPA nga si Eric Jun Casilao alyas Elian nagpatay kang Crispin Rollon alyas Jeffrey, 52, ug gilubong ang patay nga lawas sa Purok 8, Libuton sa Barangay Andap.
Si Vina, squad supply officer sa Regional Operations Command (ROC) sa Communist Terrorist Group (CTG) kinsa misurender ngadto sa puwersa sa gobyerno niadtong Abril 27, nagbutyag nga si Rollon gipatay sa ilang lider tungod kay gikonsidera siyang hasol sa ilang kalihukan samtang padulong moiktad batok sa militar.
"Dahil sa sobrang gutom, nanghina si Jeffrey, hindi na makalakad. Kaya naging pabigat, binugbog nalang siya at sinakal ni Ka Elian hanggang sa mamatay, then nilibing sa may Andap," pagklaro ni alyas Vina.
Human sa iyang pagbutyag, gilusad gilayon ang hiniusang operasyon sa 66th Infantry Battalion, uban sa mga personahe sa New Bataan Municipal Police Station ug Municipal Disaster Response Team niadtong Mayo 11, 2022 nga miresulta sa malampuson nga pagkalot sa patay nga lawas ni Rollon.
Gikondena ni Major General Nolasco A. Mempin, ang 10th Infantry Division commander, ang insidente.
"The barbaric act of NPA leaders is unacceptable. If only they chose to surrender, this would not have happened that they need to kill each other just for them to survive," matud ni Mempin.
Subling nanawagan ang opisyal ngadto sa mga rebelde nga mosurender na.
Si Casilao nag-atubang og daghang mga kriminal nga kaso sama sa duha ka ihap sa pagpatay nga pulos naa sa Regional Trial Court 11, Branch 3 sa Nabunturan, Davao De Oro, apil na ang kasong kidnapping ug serious illegal detention.
Gitumbok siyang maoy mihulip sa napatay nga si Menandro Villanueva alyas "Bok." Si Villanueva napatay sa usa ka engkuwentro tali sa tropa sa kagamhanan didto sa Barangay Libudon, Mabini, Davao de Oro niadtong Enero 5, 2022.