Paghuman sa drainage system, traffic system, pagtiwas sa ospital sa siyudad ug pag-ayo sa mga pasilidad nga nadaut sa bagyo, pagbuhi sa turismo ug socialized housing sa mga kabos maoy prayoridad sa unang 100 ka mga adlaw sa ikaduhang termino ni Lapu-Lapu City Mayor Junard “Ahong” Chan.
Sa usa ka press statement, si Chan niingon nga human sa ilang haros nga kadaugan, ang tanan niyang gustong buhaton alang sa mga Oponganon wa nay babag human nila pildeha ang tanang mga kandidato sa Team Derecho ni Kong. Paz Radaza sa bag-ohay lang natapos nga piniliay.
“Maka-assure na jud ang mga Oponganons, nga all projects nga para sa kaayuhan sa atong syudad ma-deliver na jud nato because ang tanan konsehales puros na kaabag ni Mayor Chan, parehas panlantaw ni Mayor Chan, ang tuyo ug tumong para gyud sa kaayuhan ug kalambuan sa pinalanggang dakbayan,” matod sa nasubliang mayor.
Usa sa nakita sa mayor nga angay sulbaron mao ang drainage system nga gipabuhat ni Radaza pinaagi sa Dept. of Public Works and Highways (DPWH) nga iyang gihulagway nga way lutsanan sa tubig o outfall.
Kay ang iyang asawa nga si Cindi Chan ang molingkod sa pagka representante sa lone district sa Lapu-Lapu City hulip kang Radaza sa Hunyo 30, 2022, ilang mapangitaan og paagi ang pagsulbad sa problema.
“That’s the problem, naghimo ‘ta og drainage but the problem walay kagawasan, so magbalik-balik lang gihapon,” matod sa mayor.
Mabuhat kini kaayo nila karon nga ang iyang asawa na ang kongresista.
Matod ni Chan nga kinahanglan unta nga dunay sewage treatment plant (STP) sa gawasanan sa tubig.
SKYWAY
Karon nga iya na ang tibuok Konseho, naglaum si Chan nga ila dayon maaprobahan ang skyway nga elevated nga karsada nga gilauman nga usa sa mga paagi nga makasulbad sa trapiko.
Ang skyway nga tawgon og Lapu-Lapu Expressway (LLEX) ubos sa public-private partnership (PPP) project magkonektar sa Cebu-Cordova Link Expressway (CCLEX) diretso ngadto sa Mactan Cebu International Airport (MCIA) busa di na mangagi ang mga sakyanan sa mga karsada sa siyudad ug lungsod sa Cordova.
Gipresentar kini ni Chan niadtong Disyembre apan ang proyekto nga mogasto og P24.8 bilyunes wa aprobahi sa Konseho, kansang mayoriya iya ni Radaza.
Iya usab buhion ang turismo nga naapektuhan og maayo sa Covid-19 pandemic.
Matod niya nga ang iyang asawa nisaad kaniya og suporta isip kanhi pangu sa City Tourism Cultural and Historical Affairs Commission (TCHAC).
“Ipanindot nato nga maila tibuok kalibutan, nga ang Lapu-Lapu City maoy pinaka nindot nga suroyanan sa mga turista,” matod sa mayor.
Iyang ipatiwas ang ospital sa siyudad, pagpadali sa socialized housing sa Canjulao nga usa gihapon ka public-private partnership (PPP) nga proyekto.