Mokabat sa 3,000 ka persons with disabilities (PWDs) sa Mandaue City ang gikatakdang makadawat og financial assistance pipila ka adlaw human sa election period.
Sa dihang gilibkas na ang election ban, ang local government unit (LGU) sa Mandaue City gikatakdang mo-apod-apod og cash aid sa mga PWDs karong Biyernes, Mayo 13, ug Sabado, Mayo 14, 2022, sa Mandaue Sports and Cultural Complex, matod ni City Administrator. Si Atty. Jamaal James Calipayan.
Magsugod ang distribution sa ala 1:30 sa hapon karong Mayo 13, diin ang mga rehistradong PWD ubos sa Persons with Disability Affairs Office (PDAO) sa dakbayan makadawat og Php 3,000 matag usa.
Ang cash assistance ipang-apod-apod matag batch sa 27 ka barangay sa dakbayan, nga i-post sa Facebook page sa Public Information Office sa Mandaue City.
Ang mga kwalipikadong PWD kinahanglang magdala og usa ka balido nga identification (ID) card uban sa ilang PWD ID sa pagkuha sa tabang.
Ang cash assistance matag tuig nga mokabat sa Php 6,000 ihatag matag Abril ug Disyembre apan temporaryong gisuspenso tungod sa election ban, nga nagdili sa local government units sa paggasto sa public fund 45 ka adlaw sa dili pa ang adlaw sa piniliay sa Mayo 9.
Gawas sa PWDs, ang mga senior citizen, mga 47,000 ka pamilya nga partially affected sa Bagyong Odette, ug mga 2,545 ka lehitimong tricycle drivers ug operators sa dakbayan ang hatagan usab og cash assistance sud sa buwan.
Matod ni Calipayan nga gusto ni re-elected Mandaue City Mayor Jonas Cortes nga mahatag kini nga mga hinabang sa labing dali nga panahon.
Ang Mandaue City LGU mo-post og updates sa ubang cash assistance sa ilang official Facebook page.
Dugang pa niya nga ang Kagamhanan sa Dakbayan sa Mandaue migahin og mga P165 milyones alang sa mga biktima sa Odette, P120 milyones alang sa mga tigulang, P10 milyones alang sa PWDs, ug mga P13 milyunes alang sa fuel subsidy sa operators sa publiko sakyanan.