Kapulisan sa dakbayan sa Sugbo hugot nga mopatuman sa “no permit, no rally policy” nunot sa tinguha sa mga militanteng pundok nga mohimog lapad nga lihok protesta karong hapon Mayo 13, 2022 aron ikondina ang lapad nga tikas sa milabay nga eleksyon.

Sa impormasiyon nga nadawat ang kapulisan nga magsugod ang panagtapok sa mga raliyesta sa Plaza Independencia ug dungan kini nga magmartsa paingon sa buhatan sa Commission on Elections (Comelec) sa dakbayan sa Sugbo.

Dungan kini sa samang mga kalihukan sa kaulohan diin magtapok ang mga dumadapig ni Vice President Leni Robredo.

Matod ni Police Lieutenant Colonel Maria Theresa Macatangay, information officer sa Cebu City Police Office (CCPO), ilang ipatuman ang no permit no rally policy nga maoy ordinansa sa Kagamhanan sa Siyudad sa Sugbo.

Apan iyang giklaro nga kon walay ikapakita nga permit ang mga militanteng pundok hatagan nila kinig higayon nga makapadayag sa ilang sentimyento sulod sa lima ka minutos ug ilang hangyuon nga mobungkag na.

Apan maximum tolerance ang ipatuman sa kapulisan dungan sa awhag sa mga militante nga tumanon lang ang batakang balaod sama sa dili pag guba sa mga gamit sa gobiyerno ug dili usab babagan ang dagan sa trapiko.

Masaligon si Macatangay nga motuman ra ang mga raliyesta sa Sugbo sanglit sa kasaysayan lahi ang mga militante dinhi itandi sa laing lugar sa nasod nga bayolente.

Una nang nisinggit ang mga militante sa kaulohan nga ang milabay nga eleksiyon maoy labing ngil-ad tungod sa lapad nga tikas nga nahitabo diin gigamit ang mga pulis sa pag harass sa mga botante.

Apan hugot kini nga gihimakak ni Macatangay sanglit nahimong malinawon ang eleksiyon sa Sugbo itandi sa nanglabay nga mga piniliay ug tulo lang ka insidente nga nahitabo.

Usa ka iresponsabli ang pasangil nga gigamit sila sa pagpanikas ug pagpang harass sa mga botante, sigun ni Macatangay, nga angay pamatud-an sa namasangil.

Giingong mosalmot sa rally ang supporters ni Robredo aron ipadayag ang ilang kasagmuyo ug kabalaka sa pagdaog ni kanhi senador Ferdinand Bongbong Marcos sa pagka presidente.

Sa pagkutlo ning balita wala pa mopagawas og pamahayag ang mga walhong grupo sa Sugbo labot niini.