Nasikop ang usa ka lider sa kulto sa relihiyon nga nitawag sa iyang kaugalingon nga “Dios Amahan” human gipasanginlang nanglugos sa mga babaye ug mga menor nga babaye sa iyang grupo.
Ang uban gituohan nga gipamabdosan niya.
Tungod niini, siya gipasakaan og mga kaso sa korte nga niluwat og warrants of arrest batok kaniya.
Ang National Bureau of Investigation (NBI) 7 dali nga nihimo og hot pursuit operation sa kaadlawon sa Mayo 12, 2022, sa sityo Udlom 2, San Isidro, Asturias, Cebu human nila masayri nga naa kini sa dapit.
Dali nilang gipang-serve ang duha ka warrants of arrest nga giisyu ni Regional Trial Court (RTC) Branch 59 sa Toledo City Presiding Judge Judilyn Hugo Tapia-Menchavez batok kang Teodoro Rico Feriol, alyas “Brod Doring.”
Sumala sa imbestigasiyon, si Feriol, kinsa nagtukod og kaugalingong templo sa Asturias, giingong nagtigom og mga tinun-an kay iyang gipatuo nga makaayo siya og sakit.
Apan duha sa giingong iyang mga biktima, nagpanuigon og 32 ug 17 anyos, ningdangop sa NBI niadtong Disyembre 2021 aron pagreklamo sa iyang gihimo.
Ang 17 anyos nipasangil nga gipainom siya ni Feriol og tubig nga dunay sagol nga pangkatulog.
Sa dayon niyang nawad-an og kusog, nagpakiluoy siyang di hilabtan apan wa siya paminawa sa iyang gitawag og “daddy.”
Dugang sa pasangil nga gitugotan ni Feriol ang iyang mga pasiyente nga maghimo og “mga misyon sa espirituhanon nga obligasyon,” diin gihangyo niya sila nga magpabilin sa iyang templo sulod sa daghang mga gabii.
Atol sa maong mga gabii, ang suspek giingong nihimo og sexual exploitation ngadto sa iyang menor de edad ug babaye nga mga sakop ug giingong nagpamabdos sa pipila niini.
Ang suspek kasamtangang gitanggong sa NBI Cebu District Office (CEBDO) sa Brgy. Capitol Sute ug ipaubos sa husay sa dili pa i-turnover sa Cebu Provincial Detention and Rehabilitation Center (CPDRC).
Nag-atubang siya og kaso sa paglapas sa Art. 266-A sa Republic Act 8353 o The Anti-Rape Law of 1997, Special Protection of Children Against Abuse, Exploitation and Discrimination Act ug Republic Act 7610 o Special Protection of Children Against Abuse, Exploitation and Discrimination Act.
Way piyansang gitugot ang hukmanan alang sa duha ka mga kasong giatubang sa suspek. (HIC)