Bisan pa man ning nagpadayon nga pandemya, ang Nestle Philippines nakig-abag sa Department of Education aron mapadayon ang pagpalambo sa natad sa paugnat sa kusog ngadto sa mga estudiyante.

Sa virtual press conference kagahapon Biyernes, Mayo 13, 2022, si Ricky Ballesteros, ang chief coordinator/organizer sa mga kalihukan sa Nestle Philippines, Inc. uban nila ni Milo Sports Program director ug Toni Umali, undersecretary sa DepEd, pormal nga nilusad sa Milo-DepEd Palarong Pambahay.

Ang multi-sports inter-school competition ipahigayon karong Mayo 21-22, 2022 gikan sa alas 9 sa buntag hangtod sa alas 5 sa hapon pinaagi sa Facebook live.

Walo ka events ang pagatigian sa maong kalihukan nga ipaagi sa home-based virtual sports competition. Kini mao ang athletics, arnis, basketball, football, gymnastics, jump rope, karate ug taekwondo.

Ang cheer dance competition maoy modugang sa kahinam sa kalihukan, nga abli ngadto sa pampubliko ug pribadong elementary ug secondary school student-athletes nga nagpangidaron og siyete anyos ngadto sa 15 anyos.

Sanglit usa man ka virtual ang competition, ang entries ipaagi sa recorded videos nga isumiter ngadto sa mga link sa tagsa-tagsa ka event managers nga mao nay mohukom kon kinsa ang mga mananaog.

Ang kompetisiyon gibahin ngadto sa duha ka divisions. Kini mao ang elementary students nga nag-edad og 7-12 anyos ug secondary students nga nag-edad og 13-15 anyos.

Sa kasamtangan aduna na’y events nga gipangsumiter aron mahukman.

Hinuon, matod ni Ballesteros nga aduna pa say events nga wala pa makasugod sa ilang kompetisiyon.