Wa maalarma ang Commission on Elections (Comelec) taliwa sa mga pangangkon sa napildi nga kandidato sa pagka mayor sa dakbayan sa Talisay ug incumbent Vice Mayor Alan Bucao nga adunay iregularidad atol sa pag-ihap sa mga botos niadtong Mayo 9, 2022 nga piniliay.

Si Manlalaban Jerome Brillantes, Comelec Cebu provincial elections supervisor, nipasabot nga ang board of canvassers (BOC) sa usa ka local government unit (LGU) maka-transmit sa ilang resulta sa alas 7:30 sa gabii sa higayon nga gisirad-an ang ilang clustered precincts sa eksaktong alas 7 sa gabii.

“If there’s no voter at 7 o’clock, the instruction of the EBs (electoral boards) is that we will close at 7 o’clock. That’s why minutes after, pwede na sila ka close voting then they can, after printing ERs (election returns) of national and local then transmission. [And then] 15 minutes after that, they can transmit na. So what’s the fault about it?” sulti ni Brillantes sa SunStar Cebu.

“So this is not alarming,” dugang niyang tubag sa mga pangangkon ni Bucao nga dili mapasabot sa Comelec ang nahitabo sa Talisay City, diin ang resulta sayo kaayo sa alas 8 sa gabii samtang ang ubang mga lungsod nahuman sa ilang mga tally mga alas 10 sa gabii niadtong Lunes.

Ang mga polling precinct sa tibuok nasud gisirhan sa alas 7 sa gabii, diin ang mga botante anaa na sa linya sa maong oras mahimo pa nga makabotar.

Matud ni Brillantes nga ilang gihimo ang ilang labing maayo aron lang makab-ot ang paspas nga piniliay bisan pa man nga adunay mga malfunction sa pipila ka vote counting machines (VCMs) niadtong Election Day.

Iya usab nga gisuportahan si Comelec Talisay election supervisor Anna Fleur Gujilde nga labing maayo nga ilang dawaton ang kapildihan ug tahuron ang resulta ug kaligdong sa piniliay.

Napakyas si Bucao sa pagpalagpot kang incumbent Mayor Gerald Anthony “Samsam” Gullas.

Si Bucao nakakuha lang og 31,277 ka botos samtang si Gullas dunay 93,701 ka botos samtang ang tibuok slate sa Team Alayon party nga gipangulohan sa naulahi midaog sa piniliay, mikuha sa lingkoranan sa bise mayor uban ni Richard “Choy” Aznar, ug sa tanang mga lingkoranan usab sa konseho sa siyudad.

Ang mga dumadapig sa Barug Lumad Talisaynon, ang partido politikal ni Bucao, nagpahigayon og mga rally matag gabii atubangan sa Talisay City Hall aron ipagawas ang ilang sentimento sa iyang kapildihan sa pagkamayor.

Gikwestiyon usab ni Bucao nganong napildi siya bisan sa iyang kaugalingong barangay, San Isidro, nga dako kaayog kontra kang Gullas, nga kanhi niya kaabag ug nahimong kaatbang sa 2022 elections human sa iyang giingong sunodsunod nga pakyas nga mga saad nga mopadagan kaniya pagka mayor sa Alayon.

Base sa resulta sa eleksiyon nga gihatag sa Comelec, nakakuha si Gullas og 4,571 ka botos sa San Isidro ug si Bucao nakakuha og 3,473 botos.

Gitambagan hinuon siya ni Brillantes nga mopasaka og pormal nga reklamo o election protest batok sa reelected mayor aron matubag sa Comelec ang ilang mga pagduda ug alegasiyon.