Human na ang eleksiyon, ang kapin sa 400 ka mga police nga gipang-augment sa probinsya sa Sugbo mobalik na karong adlawa, Mayo 14, 2022, sa ilang tagsa-tagsa ka unit.
Adunay usa ka team ang gipabilin una sa isla sa Bantayan aron dili pa hingpit nga biyaan ang pagpatuman sa siguridad sa maong dapit.
Matod ni Police Colonel Engelbert Soriano, hepe sa Cebu Province Police Office (CPP), ang pipila kanila ibalik sa Regional Training Center sa Consolacion aron magpadayon sa ilang police training.
Gawas sa mga pulis, adunay mga personnel sa Philippine Coast Guard ug mga sundalo ang gipadala usab sa probinsiya sanglit adunay mga lungsod nga gipaubos sa election monitoring nunot sa ka init sa dagan sa politika.
“(We) will pull out kung saan silang estasyon idiretso na sila sa training center sa Consolacion. For those who came from PRO 7, mag-report sila sa PRO 7..,” matod ni Soriano.
Giangkon ni Soriano nga ang presensiya sa kapin 400 ka mga pulis ug mga sundalo dako og natampo sa kalampusan sa gipatuman nga hugot nga siguridad nga iyang gitan-aw nga malinawon ug hapsay nga piniliay.
Ang bag-o lang natapos nga eleksiyon gihulagway ni Soriano nga maoy labing malinawon sa kasaysayan sa paghatag sa seguridad sa kapulisan lukop Pilipinas diin halos tanang mga botante ang naka pili sa ilang kandidato.
Tungod niini, iyang gipasalamatan ang kapulisan nga nisalmot sa paghatag sa seguridad ug dako niyang garbo nga nahimong kabahin siya sa malampuson nga piniliay sa Sugbo.