GIHIMAKAK sa kampo sa outgoing mayor ug presumptive vice presidential candidate Sara Duterte-Carpio ang pasiatab sa suod niyang suporter kinsa miingon nga unang himuon sa mayor, kung mahimo nang Education secretary, mao ang paghimo nga mandatory sa Reserve Officers' Training Corps (ROTC).

Sa pahayag nga giduso ngadto sa mga tigbalita, gitin-aw ni Liloan, Cebu Mayor ug tigpamaba ni Duterte-Carpio nga si Christina Frasco nga ang pag-angkon ni lawyer Bruce Rivera sa paghinabi kaniya nga ang mayor wa nagbutyag bisan usa sa iyang plano isip taliabot nga sekretaryo sa Department of Education (DepEd).

"There has been no discussion on this matter either with Atty. Rivera or with the DepEd pending the official proclamation of the VP-elect," pagtin-aw ni Frasco.

"While VP-elect Sara looks forward to fulfilling her role as DepEd secretary, she is respectful of the transition process and therefore all policy discussions will be had post-proclamation," dugang pa ni Frasco.

Gisulti ni Rivera sa paghinabi kaniya sa Wag Po! sa One PH niadtong Huwebes, Mayo 12, nga ang mayor buot nga mabalik ang mandatory ROTC sa mga kabataan.

"Inday [Sara] really wants to return the mandatory ROTC," matud ni Rivera.

Si Duterte-Carpio, sa maong adlaw, nagsulti nga iyang gidawat ang posisyon nga mahimong DepEd secretary nga gihanyag ngadto kaniya sa iyang runningmate, presumptive president Ferdinand "Bongbong" Marcos Jr. kay misaad siyang moprodyus og "skilled learners" sa nasud.

Si Marcos, sa miaging paghinabi uban sa mga tigbalita, nagbutyag sa intensiyon sa mayor nga huptan ang Department of National Defense (DND).

Si Duterte-Carpio, human siya makaboto niadtong Lunes, Mayo 9, wa mikompirma sa pahayag sa iyang runningmate ug nagkanayon nga wala pa siya maghunahuna niini niadtong higayona.

Apan sa uwahi niyang pahayag, iyang gibutyag nga una ang kampanya, siya ug si Marcos naghisgut nga nagplano sila nga itudlo siya isip secretary sa DND, apan wala kini madayon.

Si Duterte-Carpio, kinsa napromotar isip colonel sa Reserve Force sa Armed Forces of the Philippines niadtong 2018, sayo niini nagsugyot og mandatory nga pagserbisyo sa militar sa tanang Pilipino nga nag-edad og 18 anyos ug pataas kung mapili siyang vice-president.

Samtang si Education Secretary Leonor Briones, sa pahayag niadtong Miyerkules sa gabii, Mayo 11, nagsulti nga andam siyang motrabaho alang sa hapsay nga transisyon sa liderato sa DepEd. (RGL)