Nakakulit og kasaysayan si Vice Mayor-elect Raymond Alvin Garcia human iyang nakuha ang 283,235 botos nga maoy labing daghan nga botos nga nakuha sa usa ka kandidato sa tanang mga eleksiyon nga nangagi sa dakbayan sa Sugbo.
Kini ang gikumpirmar ni Atty. Edwin Cadungog, chairperson sa Cebu City Board of Canvassers (BOC), human ilang nakumpleto og ihap ang 964 ka clustered precincts sa 80 ka mga barangay sa north ug south district.
“Unprecedented gyud ni siyang sitwasiyona kay sa mga nanglabay nga eleksiyon, for mayor and for vice mayor, mao-mao ra man sila og mga boto pero karon lopsided kaayo ang deperensiya sa nidaog. Mas daghan ang niboto para sa atoang vice-mayor,” matod ni Cadungog.
Base sa talaan sa Comelec Cebu City, walay napili nga mayor o bise mayor sukad masukad kansang botos niabot og 280,000.
Niadtong 2010, si Mayor Michael Rama kinsa napili sa labing unang higayon sa pwesto, igo lang nakakuha og 210,520 botos samtang 215,425 ang iyang botos sa 2013 elections diin siya nidaog.
Niadtong 2016 elections, si kanhi Mayor Tomas Osmeña nga maoy nidaog sa piniliay batok ni Rama nakakuha og 266,819 ka mga botos samtang si Vice Mayor Edgardo Labella niadtong higayona nakakuha og 252,201 votes.
Sa 2019 elections, si Labella kinsa nilansar pagkamayor ug nipilde kang Osmeña, nihakot og 265,738 votes.
Ang chairman sa BOC nihulagway nga dako og natabang ang presidentiables sa pagsalmot sa mga tawo sa miaging piniliay diin 83.7% sa mga registered voters ang ningbotar.
“Lahi ni siya karon nga eleksiyon kay murag nibokal ang mga dugo. Nibalik ta sa pagtan-aw sa atoang history situation panahon ni Marcos ug Cory nga babaye ug laki. Kon atong makita ang mga supporter ni Cory sa una nga karon naa ni Vice President Leni, unya kang Marcos nagpabilin ang uban niyang loyalista,” dugang ni Cadungog.
Sa samang kalambuan, nakulit usab ni City Councilor-elect Dondon Hontiveros sa kasaysayan sa eleksiyon human iyang naangkon ang 191,938 nga botos gikan sa south district nga maoy labing daghan nga botos nga nakuha sa usa konsehal sa nanglabay nga mga piniliay.
Sa 2019 elections, si Hontiveros gihapon ang overall number 1 city councilor human siya nakatigom og 160,984 votes sa south district.
Sila si Garcia ug Hontiveros pulos mga “Bosconian” sanglit sila pulos nigraduwar Don Bosco Technological Center.