Usa ka 40-anyos nga lalaki namatay human dunggaba sa silingan tungod lang sa sagbot sa Barangay Tagbubonga, lungsod sa Asturias, kasadpang Sugbo niadtong Huwebes sa gabii, Mayo 12, 2022.

Si Police Staff Sergeant Ervin Jugarap, imbestigador sa Asturias Police Station, niila sa biktima nga si Rolando Nuñez, mag-uuma, residente sa dapit.

Ang suspek giilang si Junrel Codoy, 30.

Si Jugarap nga nahinabi sa SunStar nagkanayon nga nakadawat sila og tawag sa telepuno mga alas 9 sa gabii gikan sa barangay kapitan sa Tagbubonga nga nagpahibawo kanila nga adunay tawo nga gipatay sa ilang lugar.

Girespondehan dayon ni Jugarap ug kaubanan ang alarma.

Si Allan Singco, dugay na nga higala ni Nuñez, niingon nga mga alas 5:30 sa hapon, dihang nitambong siya sa ilang prayer meeting sa sunod barangay, iyang nakita si Nuñez nga nagbuy-od sa bakanteng luna, nag-atubang sa gamayng tindahan.

Nagtuo siya nga nalipong lang ang biktima samtang nakig-inom sa iyang ig-agaw nga si Jesus Singco mga alas 4:40 sa hapon.

Sa pagpauli ni Allan, iyang gisusi kon nagbuy-od pa ba si Nuñez sa maong dapit.

Sa iyang pagduol, iyang nasuta niya nga dunay samad dinunggaban sa liog ang biktima.

Base sa ilang inisiyal nga imbestigasiyon, si Codoy nigamit og hait nga sundang ug gidunggab sa makadaghang higayon si Nuñez.

Matud pa usab ni Jugarap nga ilang gikaestorya ang kapuyo ni Nuñez ug matud niya nga usa ray suspek sa pagpatay sa iyang kapuyo mao ra si Codoy kay dunay nang kaaway ang duha.

Sila si Nunez ug Codoy dugay nang nagsige og lalis kalabot sa mga sagbot sa usa ka luna nga gigamit nga pasibsibanan sa mga hayop.

Si Jugarap niingon nga pareho silang settlers ug dili tag-iya sa yuta nga ilang gilalisan.

Nakaikyas si Codoy ug nagpabiling gawasnon.

Hinuon, padayon pa ang ilang gihimong imbestigasiyon nga mosangko sa posibleng pagkasikop sa suspek.

Sa laing bahin, way plano ang pamilya ni Nuñez nga mopasaka og kaso batok sa suspek kay walay mobantay sa ilang mga binuhing hayop sa ilang umahan ug wa sab silay kuwarta.