Upat ka mga adlaw human sa 2022 national ug local elections, ang Cebu City Government nitala og zero cases sa coronavirus disease (Covid-19) sa Biyernes, Mayo 13, 2022.

Ang datos gikan sa Emergency Operations Center (EOC) nagpakita nga walay nag-positibo sa 576 ka mga indibidwal nga na-screen alang sa virus.

Si EOC deputy chief implementer ug Konsehal Joel Garganera niingon nga ikatulo na kini nga higayon karong tuiga nga walay natala nga transmission sa maong virus.

Way bag-ong kaso nga natala kaniadtong Abril 16 ug Mayo 1, diin daghang mga nagsunod nga kampanya nga gipundokan sa daghang mga tawo nahitabo sa wala pa kini nga mga petsa.

Kaniadtong Biyernes, 29 na lang ang nagpabiling aktibo nga mga kaso sa siyudad, samtang 65 sa 80 ka mga barangay ang wala’y natala nga transmission sa virus.

Sa datos sa EOC, ang nahabilin nga mga barangay nga adunay aktibo nga mga kaso sa Covid-19 mao ang: Basak-Pardo, Camputhaw, Guadalupe, Luz, Mabolo, Babag, Capitol Site, Inayawan, Kinasang-an Pardo, Lahug, Lorega-San Miguel, Pahina Central, Punta Princesa, Talamban, ug Tisa.

Matod ni Garganera nga nagpadayon ang ilang pag-monitor sa sitwasiyon ilabi na kay ang Department of Health niingon nga kinahanglan silang maghuwat og labing menos duha ka mga semana aron maobserbahan kon adunay mahitabo nga pagkuyanap human sa piniliay.

“The daily Covid-19 cases in Cebu City are low and at a manageable state. As for now, our statistical data indicators have not shown any increase nor signs of another surge,” matod ni Garganera.