Mga cause-oriented group sa Sugbo nanawagan sa Commission on Elections sa pag-imbestigar sa giingong lapad nga pagpanikas sa bag-o lang nahuman nga lokal ug nasudnong piniliay niadtong Lunes, Mayo 9, 2022.

Si Teoddy Navea sa Sanlakas-Cebu nga nahinabi sa mga sakop sa media nibutyag nga ang ilang gihimo nga protesta sa Biyernes sa hapon, Mayo 1, 2022 usa ka nasudnong kalihukan.

Matod ni Navea nga gusto nila nga moimbestigar ang Comelec sa giingong mga tikas aron mogawas ang tinuoray nga resulta sa eleksiyon.

“Ug dili nila kini mahimo nga maimbestigahan sa Comelec, wala silay katungod nga magpadayon pa sila nga mangatungdanan sa Comelec,” matod ni Navea.

Iyang gitumbok nga ehemplo sa giingong grabe nga tikas ang sa 1,800 ka mga Vote Counting Machina (VCM) nga wala pay klaro kon pila ka mga balota ang maihap gikan niini.

Ang Sanlakas ug kaubanang mga organisasiyon nagpahigayon og Black Friday protest atubangan sa regional office sa Comelec sa dakbayan sa Sugbo.