Balik sa Western Conference Finals ang Golden State Warriors human ilang gipukan ang Memphis Grizzlies 110-96 sa game 6 sa second round series sa National Basketball Association.
Ikasangka sa Warriors ang modaog sa game 7 batok sa Phoenix Suns ug Dallas Mavericks nga magduwa ugmang adlawa.
Ang kadaugan sa Golden State maoy nagluwas kanila gikan sa 3-1 lead diin ang Grizzlies nakakibhang pa sa ilang labaw 2-3 paingon sa game 6 nga maoy nagpamatuod sa kaandam sa Warriors pagsulod sa finals sa West.
Si Klay Thompson, kinsa dili pa dugay nabalik sa line-up sa Warriors, maoy nangulo pinaagi sa iyang 30 puntos, 8 rebounds ug 11 sa 22 ka mga itsa.
Sila si Stephen Curry ug Jordan Poole nga maoy nagsilbing makina sa opensa sa Warriors nagkumboya lang og 14 gikan sa 42 ka field goals.
Apan sa rebound department, nakabawi ang Golden State 70-44 gumikan sa 22 ka rebounds nga giabag ni Kevon Looney nga maoy nakatapak sa ilang 17 ka turnovers.
Ang Warriors nipakatap og 18-3 run human sa 89-87 sa nahabiling 7 minutos.
Si Andrew Wiggins maoy nagduslit human iyang napasulod ang tres, nakakuha og steal gikan ni Dillon Brooks ug gipansak og laing stop ngadto ni Brooks nga niresulta sa tres ni Curry.
Nangulo sa kapildihan sa Grizzlies mao si Brooks kinsa nipaarak og 30 puntos, Desmond Bane 25 puntos samtang wala ang ilang superstar nga si Ja Morant gumikan sa injury.