Oppsss... Human sa hataas nga panahon, sa wala damha, nalumpag ra gyud ang dominasiyon sa Ateneo Blue Eagles sa pinaka prestisyusong basketball league sa nasod nga mao ang University Athletics Association of the Philippines.
Ug ang team nga maoy nahimong babag ug nakaputol sa ilang 39 ka sunodsunod nga kadaugan mao ra usab ang team nga nipakgang sa ilang hataas nga katuigan sa pag-angkon sa nagkutay usab nga kampiyonato.
Ang University of the Philippines (UP) Fighting Maroons, ang nailang usa sa mga kulatahunong teams sa lega, maoy nipahagsa sa ilang pamanawkanaw sa kahanginan human sa tulo ka series.
Taliwala sa kulbahinam nga kadaugan sa titulo, ang pangalan ni JD Cagulangan maoy nipatugbabaw sa dihang ang tres sa nahabiling punto singko segundos sa overtime maoy mibuak sa panagtabla ug miugbok sa paglaom sa Ateneo.
Minuto sa wala pa sa iyang bayanihong itsa, si Cagulangan mipabuto og usa ka tres ug nakahimog assist ngadto sa ilang import nga si Malick Diouf aron tablahon ang score, 69-69.
Kasingkasing sa usa ka warrior maoy gipakita ni Cagulangan kay bisan pa man og nasipyat siya sa kadaghang higayon sa iyang mga itsa, apan wa kini makapatarog sa iyang determinasyon.
“Atin ito.” Kini maoy usa sa mga inspirasiyon nga iyang gitamod sa dihang sikit kaayo ang ilang panag-engkuwentro.
Ug kini maoy butang nga iyang nakuha ug nadungog nga tambag gikan sa Sugboanong si Paul Desiderio, ang kanhi sakop sa Fighting Maroons nga naggiya usab sa UP ngadto sa finals kausa ka higayon.
Si Cagulangan, lumad nga taga Butuan City, apan didto na mag-eskuwela sa kaulohan.
High school pa lang siya varsity player na siya sa La Salle Green Hills ug nahimong MVP sa NCAA juniors.
Sa iyang pagtak-ang sa kolehiyo, gibira siya pasaka sa De La Salle University (DLSU) Green Archers apan wa kini magamit gumikan sa ka abunda sa mga magduduwa sa iyang position.
Kini maoy rason nganong nibalhin siya sa UP ug didto ubos sa bag-ong coach nga si Goldwin Monteverde nahatagan siya og saktong exposure.
Ang bayanihong tres ni Cagulangan lisod papason ug nakulit na sa kasaysayan sa UP ug sa UAAP kay kini maoy nagwagtang sa 36 ka tuig nga kauhaw sa Fighting Maroons sa maong kampiyonato.
Ang UP mibira sa ilang unang kampiyonato niadtong 1986. Kini panahon pa nila ni Benjie Paras ug Ronnie Magsanoc ubos sa paggiya ni coach Joe Lipa.
Apan human niini, UP was never the same again, hangtod nga kadtong tres ni Cagulangan nga iyang gipabuto sa adlawng Biyernes petsa 13 sa Mayo maoy naghatod sa katumanan sa ilang damgo.
Congratulations, Fighting Maroons! You deserve it! Congrats Blue Eagles for a good fight! Sa kinatibuk-an, Congratulations UAAP kay kamo maoy tinud-anay nga mananaog.
Entertainment is at its best. (jun.migallen22@gmail.com)