Daghan kaayo rong panahuna og fake. Ang komon kaayo mao ang fake news. Bisan sa biseklita gani, naa may daghang fake. Kon sa news pa, ari ka mobasa sa mga site nga gipanag-iya sa institusiyon na sa natad sa balita, sama sa amoang brand, SunStar ug Superbalita kay di man mi magmugna og fake nga mga estorya. Ang amoang gipangsuwat gibase na sa among mga interbyu sa sources ug mga pangduki-duki.
Mao sab ni sa biseklita. Kanang mangutana sa akoa kon fake ba o di ang bike, akong ingnon nga adto lang sa authorized dealer sa ganahan nga brand mopalit. Base gud sa akong experience, nakakita ko og bikes nga sikat ang brand ug model apan pwerteng baratoha. Mao diay kay fake.
Nahimuot gani ko sa miaging tuig kay dunay Santa Cruz nga gibaligya online nga tag P15K ug dunay Giant nga tag P8K lang. Sa comments sa ubos sa netizens nga hapit nangabiktima, niingon nga pangilad. Usa sa timailhan sa ilad kay pabayron ka daan sa item. Di nuon tanan.
Akong kanunay buhaton mao ang pagsusi sa background sa seller. Usually naa na sa social media.
UNSAON PAG-ILA
Kaduha pa ko nailad, but sala sab nako kay nisalig ko sa usa ka platform kay ka daghan na ko nakagamit sa transactions.
Sukad adto, wa na ko nigamit. Mamalit ko sa online anha na ko sa social media nangita. Una gyud nga imong tan-awon mao ang comments sa mga nakasuway na. Mao ni ang reviews.
Unya ang mga nag comment imo sab tan-awon ang ilang social media profile aron imong masuta ang katinuod o authenticity sa lang sulti. Mas daghang review o comments, mas kasaligan ang produkto.
Sunod nimong tan-awon mao ang profile sa store. Dayon unsay tubag sa seller sa mga inquiry. Usually, ang mga mangingilad di manubag, adto na sila sa direct message (DM) motubag. Dinhi, angay kang magbantay.
Tan-awa usab ang prevailing price sa brand ug model nga imong gipangita. Kon hapit tinunga ang deperensiya sa seller ug ang market price, angay kang magbantay.
Sagad sa maayo ang produkto o kasaligan ang seller kay mag cash on delivery (COD). Wa pa ko kasuway nga nabiktima ko og fake sa nag COD. Apan aron ka makasegurado, pangutan-a ang nag deliver kon unsay feedback sa cutomers nga iyang nahatdan.
Ang tig deliver man gud mohatag nag feedback kon imong pangutan-on kay sila man ang tawgan gilayon sa kustomer nga nailad o wa matagbaw sa produktong gihatod.
MAGBANTAY
Kining akong gisuwat mao ni ang kanunay nakong gibuhat basta mopalit ko og online. Sa ako nang ginaingon, kaduha pa ko nailad but medyo mahalmahal sab to.
Mas maayo nang magbantay ta nga di mailad kay wa ra ba nato ni gipamunit ang atoang kwarta. Sagad gani nato mang loan aron ta makapabarog og biseklita. Unya ilaron pa gyud ta? Sakit, di ba?
Hinuon, sa biseklita, wa pa ko mailad sa parts nga akong napalit. Basta ako mag research ko sa produkto ug brand nga akong paliton una ko mo engage og seller.
Sagad natong tig bike ordinary workers. Gihaguan nato ang kwarta unya magpailad lang ta sa naghago sab og pangilad?