Nahuman na man unta ang eleksiyon, apan grabe gihapon ang away sa social media sa mga BBM-Sara batok Leni-Kiko. Mga managhigala kaniadto, managkaaway na karon. Magtawganay pa og di maayo. Nagputlanay sa ilang relasiyon nga katuigan ang pagtukod sa pundasiyon.

Duna bay nahitabong mga tikas? Lisod ni pamatud-an karon nga electronic na ang paagi sa pagbotar ug pag-ihap sa mga balota. Dunay mga pagtuo nga dunay tikas sa eleksiyon kay ngano kunong dali ra kaayong nahuman sa pag-ihap.

Dali ra kaayo ang pagpasangil, apan ang pagpamatuod pinaagi sa solidong ebidensiya malisod. Mas maayo kon ang namasangil mokuha daan og ebidensiya una pa mamasangil nga dunay pagpanikas. Ang Supreme Court mismo nisalikway sab sa pasangil nga dunay mga pagpanikas niadtong 2016. Bisan ang election watchdogs niingon nga way tikas nga nahitabo sa miaging eleksiyon.

Ibutang ta lang nga dunay tikas, apan ingon gyud niana ka dako ang labaw? Ingon niana ka dako ang gitikas nga botos?

Kay lisod man pamatud-an kining mao nga alegasiyon, mas maayo kon ari na lang sa pagbantay sa mosunod nga administrasiyon ang tutokan. Inay magyawyaw ug mag-away, mas maayong maghiusa, magtukod og organisasiyon nga magbantay nga di molikoy ang mosunod nga administrasiyon ni presumptive President Ferdinand “Bongbong” Marcos, Jr.

Dawaton ang kapildehan ni Bise Presidente Leni Robredo, apan maghiusa aron bantayan ang umaabot nga administrasiyon. Bantayan nga di masubli ang kasaysayan, labina panahon sa Martial Law. Pinaagi niini, ang unsay gibarugan sa miaging eleksiyon magpadayon nga buhi bisan sa dakong kaparutan nga naangkon.

Tungason man gud kaayo ang pagpamatuod sa pagpanikas sa nasudnong piniliay kay sukad sa kasaysayan wa pay namatud-an. Busa, ang pagmabinantayon mao ang labing maayong alternatibong paagi sa pagpadayon sa gibarugan. Move on, apan magbantay kanunay.