Gipaabot nga mobaha na sab ang mga tawo sa Citi de Mari sa South Road Properties (SRP) karong alas 5 sa hapon sa Dominggo, Mayo 15, 2022.
Si Mayor-elect Michael Rama nipahibawo nga ang Barug, PDP-Laban ug Marino party-list mopahigayon og ‘Panag-abot Pasalamat’ nga pahinungod sa mga tawo nga ningsuporta kanila niadtong Mayo 9, 2022 nga piniliay.
“Gikan sa kinahiladman sa akong kasingkasing, apil na ang akong pamilya sa pagpasalamat kaninyong tanan sa inyong suporta sa partido Barug, PDP-Laban ug Marino party-list,” matod ni Rama sa usa ka mensahe.
Ang kalihukan sal-utan usab og konsiyerto sa nagkadaiyang mga banda.
Sugdan kini sa alas 5 sa hapon pinaagi sa “Tambolista showdown” nga molanat og duha ka mga oras.
Sa alas 7 sa gabii, ipahigayon ang thanksgiving mass ug human niini mosunod gilayon ang programang Pasalamat.
Sugdan sa alas 9 sa gabii ang konsiyerto nga apilan sa Sinulog Idol, Sakdap ug uban pang mga banda.
Sila si Rama ug iyang runningmate Konsehal Raymond Alvin Garcia ug kaubanan sa Barug hapit niharos sa bag-ohay lang natapos nga lokal ug nasudnong piniliay.
Si Rama nakakuha og 226, 328 botos samtang ang iyang labing sikit nga karibal nga si kanhi konsehal Margot Osmena nakakuha lang og 190,836 kun 35,942 nga labaw sa nahauna.
Si Garcia nakakuha og 283,235 botos nga giisip sa Commission on Elections (Comelec) nga makasaysayanon kay maoy labing taas ug dako pa kay sa botos sa mayor.
Ikaduha na kini nga panagtapok nga gipasiugdahan sa Barug sa SRP.
Ang una gipahigayon niadtong Abril 18, 2022 atol sa rally sa UniTeam nga gitambungan nila ni presumptive President Ferdinand Marcos ug presumptive Vice President Sara Duterte-Carpio.
Ang kalihukan gitambungan sa gibana-banang 300,000 ka mga tawo.