Ang Mathematics tingali ang labing lisod nga subject kon mangutana ka sa bisan kinsa nga estudyante.
Mao usab kini alang kang Angelo Hinayas Sigue, niggraduwar sa Cebu Technological University (CTU-Main), nga ika-unom sa bag-ohay lang nga Mayo 2022 Civil Engineering Licensure Examination (CELE).
Si Sigue, nga adunay average nga 92.60%, uban ni Kaizen Daniel Oriel, nga ika-8 nga pwesto nga adunay average nga 92.20%, mao lamang ang duha ka mga graduwado sa Sugbo nga ning-top sa CELE sa labing bag-ong resulta niini.
Sa interbyu sa Sunstar, giangkon ni Sigue nga wa niya pilia ang engineering. Apan na-inspire siya sa iyang igsuon nga si Ramel Hinayas Sigue nga nag-top sab sa CELE niadtong 2015, nga nitugpa sa 9th place.
“Engineering was never my field of choice. There was even a time that I felt so down during my first year in college when I got a low grade in Math. But knowing my brother also topped CELE, he inspired me and gave me a wake-up call to study harder,” matod niya.
Nigradwar niadtong Agusto 2020 ang 23-anyos nga ikaupat sa lima ka managsuong anak og ice cream vendors nga taga dakbayan sa Lapu-Lapu.
Gipaambit usab ni Sigue nga ang kanunay nga pag-postpone sa board exam tungod sa pandemya nakapawala sa iyang interes ug gana sa pag-review. Apan mibalik siya pinaagi sa paglingi pag-usab sa iyang tumong: nga mahimong usa sa mga top notchers.
“If you are tired, just rest and never give up. I keep on repeating that in my mind every time frustration starts to consume me. It works every time as I really want to top the test,” siya nidugang.
Miapil usab siya sa daghang mga kompetisiyon sa Mathematics ug mga quiz bee samtang naa sa eskuylahan aron mahait ang iyang kahanas sa pagsulbad ug pag-analisar.
VIGIL
Gitug-an ni Sigue nga nagsagol ang iyang emosiyon sa adlaw sa resulta. Dugang pa niya nga excited, nabalaka, ug na-pressure siya dungan sa paghuwat gyud sa iyang pamilya sa ipagawas nga resulta sa Philippine Regulatory Commission (PRC).
“It took them (his family) until 1 am to wait for the result. Then, my brother woke me up to tell me the news. I was so happy, for I know God never left me through my journey,” dugang niya Sigue.
Karon nga siya usa na ka propesiyonal nga civil engineer, mas palapdan niya ang iyang kasinatian ug magpadayon sa iyang master’s degree.
Matud pa niya nga dako kaayo siya og pasalamat sa tanan niyang mga minahal sa kinabuhi ug mga magtutudlo, gikan sa CTU ug sa iyang review center, kinsa matud niya, maoy nag-unang rason sa iyang kalampusan.
Giawhag niya ang mga batan-on nga dili mohunong sa ilang mga tumong ug magbaton og lig-on nga pagtuo sa balaang panahon.