Mokabat sa 716 ka mga personnel sa Philippine National Police (PNP) ang nangataktak sa serbisiyo human nasuta nga nalambigit sa ilegal nga drugas.
Ang mga dismissal naglambigit sa mga personnel kansang mga administratibong kaso naresolbar gikan sa Hulyo 2016 hangtod Mayo 4, 2022.
Si PNP Officer-In-Charge Police Lt. Gen Vicente Danao Jr. nipagawas sa impormasiyon niadtong Huwebes, Mayo 12, 2022.
Matod ni Danao nga sa 716 ka nakasala nga PNP personnel, 527 na ang na-dismiss sa tibuok nasud tungod sa paggamit sa illegal nga drugas samtang 189 ang na-dismiss tungod sa ilang pagkalambigit sa ubang mga kaso nga may kalambigitan sa drugas.
Matod niya sa 527 ka mga tiggamitan og ilegal nga drugas, 10 ang police commissioned officers, 502 ang police non-commissioned officers samtang 15 ang non-uniformed personnel.
Sa bahin sa 189 nga na-dismiss tungod sa kalambigitan sa ubang mga kaso sa drugas, 11 ang police commissioned officers, 177 ang police non-commissioned officers, samtang usa ang non-uniformed personnel.
Bisan pa, ang 716 nga na-dismiss tungod sa mga kaso nga adunay kalabotan sa drugas naglangkob lamang sa tres porsyento sa 21,306 ka mga personnel sa PNP nga gipaubos sa mga kaso nga administratiba tungod sa lainlaing mga paglapas sa unom ka tuig nga yugto, ingon niya.
Sa pagkutlo sa datus gikan sa PNP Directorate for Personnel and Records Management, si Danao nagkanayon nga sa 21,306 ka mga PNP personnel, 5,652 ang natangtang sa serbisyo, 1,150 ang na-demote, 10,650 ang nasuspenso, 853 ang gisilotan og salary forfeiture, 2,491 ang gibadlong, 28 ang gi-restrict ug 222 ang gi-restrict sa quarters ug 288 gipugngan ang mga pribilehiyo.
Matod ni Danao nga nagpakita kini nga wala gikonsentir sa PNP ang pag-apil sa bisan kinsa nga sakop niini sa ilegal nga kalihokan. Wala niya gidetalye kon unsa ang mga sala sa ubang mga pulis, apan ang PNP una nang nagpahibawo sa ilang pagsumpo sa kurapsiyon ug uban pang mga kalapasan.
Sa Abril 12, ang PNP adunay 224,362 ka mga ginsakpan.
Si Presidente Rodrigo Duterte nidaug sa 2016 elections luyo sa saad sa kampanya nga wagtangon sa nasud ang “kurapsiyon, drugas ug kriminalidad” sulod sa tulo ngadto sa unom ka bulan.