Kon kinsa ang namunoan ila kining respetuhan ug suportahan.

Mao kini ang giluwatan nga pamahayag ni Police Colonel Engelbert Soriano, direktor sa Cebu Police Provincial Office (CPPO) human sa pagtumaw sa dakong labaw nila ni presumptive President Ferdinand “Bongbong” Marcos Jr. ug sa iyang runningmate presumptive Vice President Sara Duterte-Carpio.

Matod ni Soriano nga ilang suportahan ang mga programa ni Marcos alang sa pagpalambo sa kahapsay ug kalinaw sama sa gibuhat ni Presidente Rodrigo Duterte.

Ilang sundon ang kamandoan niini isip commander-in-chief.

“Alam nyo po kami naman ay law enforcement agency. Kung ano ang guidance ng ating bagong presidente ay susunod kami. At excited din po kami kung ano yung mga bagong ipapatupad, and of course yung pinapatupad natin under Presidente PRRD ay nakita naman natin lahat napakaganda, lalo po sa particularly sa peace and order ng lahat ng lugar sa Pilipinas,”matod ni Soriano.

Nanghinaot si Soriano nga mapadayon pa ang ubang nasugdan nga mga programa sama sa kampanya batok sa illegal nga drugas ug madugangan usab og labing epektibo nga pagpatuman sa balaod.

Iyang gisalikway ang mga hungihong nga dunay mahitabo nga kudeta.

“After every election obserbahan mo, laging may ganyang tsismis. We will always align with our leadership,” dugang ni Soriano.

Sa tinguha nga molusad og halapad nga protesta ang mga militante sa Sugbo, matod niya ang kapulisan padayon sa ilang pag monitor.

MAXIMUM TOLERANCE

Si Police Brigadier General Roque Eduardo Vega, hepe sa Police Regional Office 7 (PRO 7), nipagawas og kamandoan sa tanang personnel nga ipadayon lang ang pagpatuman sa kahusay ug kalinaw sa ilang dapit.

Lakip na niini ang pagpatuman sa maximum tolerance kon mohimog kalihukan ang cause-oriented groups uban sa mga supporter ni Vice President Leni Robredo.

Nanawagan si Vega sa publiko nga natapos na ang piniliay ug nidesisiyon na ang labing daghang Pilipino kon kinsa ang ilang gusto nga mangu sa nasud, angay kini nga respetohan.

Girespeto usab sa kapulisan ang katungod sa katawhan sa pagpagawas sa ilang opinion ilabi na ang pagduda sa nigawas nga resulta sa eleksiyon.

Apan matod niya nga labing maayo nga buhaton sa mga agrabyado nga ipaagi sa proseso ang ilang protesta pinaagi sa pagduso og reklamo ngadto sa Commission on Elections.

“Teaching the youth, the love of the country, is an imperative antidote to combat terrorism, especially since there are groups that will take advantage of their vulnerability and urge them to join street demonstrations instead of going to school,” matod ni Vega.

Pipila ka mga adlaw human sa eleksiyon, mga militanteng grupo ningpahigayon og protest rally sa nagkadaiyang mga dapit sa dakbayan sa Sugbo.

Gipasagdan lang sila kapulisan apan gibantayan aron di makamugna og kagubot.