Gideklarar nga dead-on-arrival sa tambalanan ang usa ka lalaki human pusila pasado alas 9:00 sa gabii sa Sabado, Mayo 14, sa Sityo Panaghiusa sa Barangay Duljo Fatima, siyudad sa Sugbo.
Si Patrolman Glendell Cabañero sa Mambaling Police Station nibutyag nga ang maong biktima hangtud ning pagsuwat, wala pa mailhi ug wa pay kabanay nga nikuha sa lawas niini.
Dugang ni Cabañero nga sa pagsusi ni Police Staff Sergeant Mark Anthony Dela Victoria, imbestigador sa nahitabong pagpamusil, nasayran nga dunay mga tawo sa dapit atol sa nahitabo nga nakadungog og pipila ka buto sa armas.
Ug sa dihang ilang gigawas aron sutaon kon kinsa ang nagpabuto, ilang nakit-an kining maong lalaki nga nagbuy-od na sa yuta samtang naglisod og ginhawa nga nagkadugo.
Sa pagdala sa biktima sa tambalanan sa mga sakop sa medical personnel, ang doktor nga miatiman sa biktima nideklarar niini nga DOA.
Ang Mambaling Police Station blanko pa sa posibleng motibo sa pagpamusil.