Neutral ang posisyon sa Commission on Elections (Comelec) bahin sa panawagan ni Pres. Rodrigo Duterte sa pagwagtang sa partylist system.
Sa press conference niadtong Biyernes, Mayo 13, si acting Comelec spokesman John Rex Laudiangco niingon nga dili makahukom ang ilang buhatan sa pagpabilin o pagpapas sa partylist.
“These matters are within the wisdom and jurisdiction of Congress,” matod ni Laudiangco.
Alang sa Comelec, sila nagtuman lang sa gimando sa balaod nga ilang tahas.
Dugang pasabot niya nga ang Comelec dunay mandato sa Batakang Balaod sa pagdumala ug pagpatuman sa tanang kasamtangan balaod sa eleksiyon.
“For as long as there is that law providing for the partylist system, we will comply with that,” matod ni Laudiangco.
Niadtong Huwebes, Mayo 12, si Duterte niawhag sa iyang sumosunod sa pagwagtang sa partylist system.
Sa kasinatian, si Duterte nagkanayon nga kini gigamit sa mga adunahan ug gamhanan sa pagduso sa ilang interes sa Kongreso.
Lakip sa gisaysay ni Duterte nga ang partylist system gigamit sa mga komunista aron makasulod sa Kongreso.
Apan sa ilang bahin, ang poll watchdog, Kontra Daya, nagtuo nga ang maayo kon ang partylist system gipaubos sa pag-amendar apan dili kini wagtangon.
“Kontra Daya’s position is to amend the Partylist System Act of 1995 to make it more consistent with the provision in the 1987 Constitution,” sumala sa ilang pamahayag. (HDT / SunStar Philippines)