MGA duwa karon
4:30 pm- San Miguel batok NorthPort
7:00 pm- Alaska batok Talk N’ Text
Duha ka tinagakay nga mga kombati ang masaksihan sugod karong hapon sa Philippine Basketball Association (PBA) Commissioner’s Cup quarter-finals sa Araneta Coliseum.
Sa premirong duwa, ang No.7 San Miguel Beermen makigharong sa No.2 NorthPort Batang Pier samtang magparang sa main game ang No.8 Alaska Aces ug No.1 Talk N’ Text KaTropa.
Ang Beermen ug Aces, duha sa upat ka teams nga nakalangkat og talagsaong Grandslam title, nakakita pa og laing pagsidlak sa adlaw human nila gipanglampornas ang ilang tagsatagsa ka twice-to-beat nga kontra niadtong Dominggo.
Gipanghubog sa Beermen ang Batang Pier, 98-84, samtang gipanglampornas sa Aces ang KaTropa, 108-72.
Ang KaTropa ug Batang Pier naggunit og twice-to-beat nga bintaha sa quarter-finals isip benepisyo sa ilang pagkasulod sa top two human sa elimination round.
Ning higayuna nga napapas na ang mga twice-to-beat nga bintaha, tatawng anaa na sa Beermen ug Aces ang momentum ning maong mga panagparang.
Nasayod ang Beermen nga ipagawas sa Batang Pier ang tanan nilang makaya nga nagtuboy kanila sa No.2 nga puwesto ug mao kini ang ilang gipangandaman.
“So it’s a do-or-die game, and I expect them to be at their best on Wednesday and I expect us to be at our best, too. It’s definitely gonna be another battle. It’s gonna go down to the end and we’re definitely looking forward to it,” matod sa pambatong pointguard sa Beermen nga si Chris Ross nga napatik sa PBA.PH.
Niadtong Dominggo, duha ka mga dagkong labaw sa Beermen ang gipangpapas sa Batang Pier nga timaan lang nga adunay ikabuga ang Batang Pier batok sa multi-titled squad nga Beermen.
“Inconsistent kami on offense saka defense,” pag-angkon sa usa sa mga sinaligan sa Beermen nga si Arwind Santos.
“Kasi nag-li-lead na kami ng 15 points, ganyan, bigla na lang nahahabol pa. Parang iyung sakit namin dati na di maiwasan.”
Sa laing parisan, nagkanayon si Alaska coach Alex Compton nga nasurpresa siya nga ilahang nalubong ang KaTropa niadtong Dominggo nga unta mao man kini ang No.1 team sa komperensiya.
“I think a big part of it was they (TNT) missed shots they normally make. These games happen and TNT is a great team. If anybody, especially anybody from Alaska, were to judge them from this game, he would be foolish,” matod ni Compton.
Gipasabot ni Compton nga ang dako nilang kadaugan sa Game 1 wala mosaka sa ilang alimpatakan ug kinahanglan pa nilang mokayod og maayo aron mahuman nila kining maong misyon. (ESL)