Nitibugsok ngadto sa 76.5 porsiyento ang walo ka gitutokang krimen sa tibuok probinsya sa Sugbo atol sa pagsugod sa election period sa lokal nga mga kandidato gikan niadtong Marso 25, 2022 ngadto sa Mayo 10, 2022. Kini kon itandi sa duha ka mga nangaging eleksiyon sa susamang panahon.

Sa talaan sa Cebu Police Provincial Office (CPPO), nakatala ang kapulisan sa probinsya og 150 ka kaso sa 2022 nga mas ubos niadtong 2016 nga mitala og 563 ug 639 sa 2019 nga eleksiyon.

Ang bag-ong natapos nga national ug local elections sa Mayo 22, 2022, maoy labing malinawon sa mga piniliay sa kasaysayan sa lalawigan human walay dagkong insidente nga nahitabo, sumala sa CPPO.

Ang eight focus crimes mao ang physical Injuries nga nitala og 30 ka kaso itandi sa 174 sa 2017 ug 166 sa 2019 diin mikunhod kinig 81.9 percent.

Rape o lugos, dunay 62.1 percent nga pag-ubos sanglit nakatala sila karong tuiga og 22 itandi sa 35 niadtong 2016 ug 58 sa 2019.

Ang tulis o robbery nga aduna lamay 23 itandi sa 112 sa 2016 samtang 91 sa 2019 nga adunay pag-ubos sa 74.7 porsiyento.

Aduna lamay 55 ka kaso sa kawat ning tuiga itandi sa 186 sa 2016 ug 264 sa 2019 nga mikunhod og 79.2 porsiyento.

Sa kaso sa homicide, nakatala ang CPPO og upat itandi sa lima sa 2016 ug unom sa 2019 nga adunay pag-ubos og 33.3 percent.

Ang patay o murder, dunay 12 sa 2022 samtang niadtong 2016, dunay 28 ka kaso ug 30 niadtong 2019 nga niubos kinig 60 porsiyento.

Samtang sa carnapping sa motorsiklo, nakatala lang sila og tulo karong tuiga itandi sa 23 sa 2016 ug 21 sa 2019 nga adunay pag-ubos sa 85.7 porsiyento ug 66 porsiyento ang pag-ubos sa carnapping sa mga sakyanan.

Matod ni Police Colonel Engelbert Soriano, hepe sa CPPO, tungod kini sa ilang subsob nga pagpangandam sa seguridad sa eleksyon, ilang natutukan pag-ayo ang tanang matang sa krimen.

Usa na niini ang kamandoan sa officer in charge sa Philippine National Police (PNP) nga siguradohon ang pagpatuman sa kaluwasan sa uban sa mga kaabag niini sama sa Commission on Elections (Comelec), Department of the Interior and Local Government (DILG), Armed Forces of the Philippines (AFP), Philippine Coast Guard (PCG), Philippine Navy (PN) ug Bureau of Fire Protection (BFP) nga yawe sa malampuson nga piniliay sa Mayo 9, 2022.

Apan dugang ni Soriano nga wala sila mohunong sa ilang pagbantay bisan natapos na ang eleksyon sanglit hugot ang ilang pag-monitor hangtod nga makab-ot ang malinawon nga transition sa gobiyerno sa Hulyo 1, 2022.

“We sustain this vigilance after the election to ensure smooth transition and we will stop all illegal assemblies by losing candidates that are intended to disrupt peace and order in the province,” matod ni Soriano.

Adunay mga hulga nga nadawat ang kapulisan lukop Pilipinas apan dili sila makatugot nga molampos ang ubang grupo nga nagtinguha nga tumbahon ang gobyerno pinaagi sa ilang pag-alsa.

Gibutyag ni Soriano nga ang bag-o lang natapos nga national ug local elections maoy malinawon tungod sa kataas sa pagpangandam sa kapulisan ug ubang law enforcement agencies nga miabag sa Comelec aron makab-ot lang ang hapsay, malinawon ug patas nga piniliay.