Dul-an P1 milyon nga balor sa illegal nga drugas ang nasakmit sa kapulisan sa siyudad sa Talisay atol sa duha ka anti-drug operations sa managlahing lugar nga kabahin sa Oplan Limpyo Talisay sa Sabado sa gabii, Mayo 14, 2022.

Unang nadakpan sa alas 12:48 sa kaadlawon mao si Junjie Labuca Cabuenas, 26, e-bike driver ug taga Sitio River side, Barangay Cansojong, Talisay.

Nasikop siya sa buy-bust sa dalan S. Abarquez sa Cansojong diin nakuhaan siyag 80 gramos sa gituohang shabu nga adunay standard drug price nga P544,000.

Matod ni Police Lieutenant Colonel Randy Caballes, hepe sa Talisay City Police Station, nga nalakip si Cabuenas sa listahan sa high value individual (HVI).

Nadakpan na niadtong Agusto 2019 si Cabuenas sa kaso gihapon sa illegal nga drugas apan nakagawas pagka Nobiyembre 2020.

Si Cabuenas nangangon sa imbestigasyon nga usa ka ‘Intsek’ nga naa sulod sa Cebu City Jail (CCJ) maoy iyang kontak sa pagkuha og supply sa drugas, sumala sa hepe.

Makabaligya og 100 grams matag semana ang suspek diin ang tibuok Cansojong ang iyang area sa distribution sa illegal nga drugas, dason sa hepe.

Samtang pagka alas 10:48 sa gabii sa Sabado, nasikop na usab sa kapulisan sa Talisay ang usa ka dalaga nga nalakip sa HVI atol sa buy-bust niini sa Sitio Salvador, Barangay Tangke.

Ang nadakpan giila nga si Kharyl Requeron Cabando, 26, ug nagpuyo ra usab sa maong dapit. Nasakmit sa posisyon sa suspetsado ang 50 gramos nga gituohang shabu nga adunay standard drug price nga P340,000.

Ang suspek, sigon ni Caballes, kanunay na nga ma-report sa ilang police station nga nalambigit sa pagpamaligya sa illegal nga drugas.

Human madawat ang kasayuran gilusad dayon ang operation nga miresulta sa iyang pagka sikop.

Nagsugod sa iyang illegal nga negosyo si Cabando sa Oktubre 2021 pa diin ang iyang distribution mao ang Tangke diin makabaligya siyag 50 gramos matag semana.

Sa gihimong imbestigasyon, gikan gihapon sa nabilanggo nga drug lord sa CCJ nga iyang kontak sa supply sa illegal nga drugas nga nag-alyas og ‘Mateo.’

Tungod sa maong mga impormasyon, ang Talisay City Police Station nakig-alayon sa Bureau of Jail Management and Penology (BJMP) alang na sa pagsubay sa mga gaway niining mga priso nga nagpadayon sa ilang illegal nga negosyo sa gawas.