KARONG adlawa nakatakdang pasakaan og kasong murder ang suspek nga miluba-patay sa mag-amahan niadtong Sabado, Mayo 14, 2022, sa Galendez’s Boarding House sa Diamond Village, Barangay Matina Aplaya, Talomo District, Davao City.

Si Police Major Noel Villahermosa, hepe sa Talomo Police Station nag-ila sa suspek nga si Reo Aquino Ballenas, 30-anyos ug renter sa Galendez’s Boarding House samtang ang suspek mao ang mag-amahang sila Panfilo Orosio Manrique, 71-anyos, ug si Geraldine Eltagonde Manrique, 43-anyos.

Nasayran nga natigayon ang kasamok sud sa lawak nga girentahan sa mga biktima diin alegasyong naglalis ang mga biktima tali sa suspek labot sa resulta sa eleksiyon.

Apan una nahitabo ang krimen, sumala ni Major Villahermosa, daan nang naaburido ang suspek dihang nilayas ang kapuyo niini nga usa sab sa mga anak sa biktima nga si Panfilo.

"Kani, naa man gud sila'y problema sa pamilya. Nilayas tong ka-live in ni Rio, a day before. The following day, naa nay panaglalis about family, then nasagulan pa gyud about politics," ingon ni Villahermosa.

Giingong lahi ang kandidato nga gisuportahan sa suspek, lahi sab sa mga biktima, diin ang suspek wala kadawat sa hitabo diha sa resulta sa piniliay.

Perteng sukoa sa suspek ug nadugangan sa hitabo nga milayas ang iyang kapuyo, hinungdan nga nikuha kini'g kutsilyo ug gipangluba ang mga biktima kinsa dead on the spot.

Nakita pa ang suspek sa ilang silingan nga nagdagan kinsa nagkadugo ang kamot, ug miingon pa kini sa lalaki nga nakakita, "patya ko Kol, kay napatay nako sila," dayon dagan padung sa wa matimo nga direksiyon.

Pipila ka oras gikan sa hitabo, nasikop ang suspek kinsa miangkon nga iyang napatay ang mga biktima gumikan sa kasuko niini sa ilang panaglalis tungod sa resulta sa eleksiyon.

Ang patay nga lawas sa mag-amahan gilayong gidala sa Villa Funeral Homes sa Toril Davao City alang sa otopsiya samtang ang tulo ka menor de edad nga giingong anak sa suspek ang anaa na karon sa kustodiya sa Women and Children Protection Desk sa Talomo police.