7 ka barangay kapitan ‘nasikop’, nakapiyansa

Tampo
Tampo

Pito ka mga barangay kapitan sa dakbayan sa Lapu-Lapu ang nakagawas sa detensiyon human nakapiyansa sa Lunes sa buntag, Mayo 16, 2022.

Ang mga opisiyal boluntaryong ningtahan sa Criminal Investigation and Detection Group (CIDG-7) headquarters sa Camp Sotero Cabahug sa Gorordo Avenue, dakbayan sa Sugbo niadtong Lunes sa buntag sa kasong grave oral defamation nga may kalambigitan sa Cybercrime Prevention Act of 2012 nga gipasaka ni Mayor Junard "Ahong" Chan batok nila.

Apan sa taho sa Lapu-Lapu City Police Office (LCPO), “arrested” ang pito human niabag sa pagdakop ang Station 3 sa LCPO.

Si Police Patrolwoman Kaye Jacaban nitug-an sa Sunstar nga ang mga opisiyal nipresentar sa ilang kaugalingon ngadto sa CIDG-7 headquarters nunot sa pending nga warrant of arrest nga giisyu ni Judge Anna Marie Militante sa 7th Judicial Region Branch 53 sa dakbayan sa Lapu-Lapu kalabot sa kasong grave oral defamation nga kalapasan sa section 6 sa Republic Act 10175 o Anti-Cybercrime Act of 2012 nga gisang-at sa mayor.

Sila si Eduardo Cuizon, 63, taga Barangay Bangkal; Eleonor Fontanoza, 57, taga Barangay Gun-ob; Regina Ybanez, 63, taga Looc; Triponia Abayan, 69, taga Barangay Tungasan; Joselito Tibon, 56, taga Barangay Subabasbas; Reynaldo Tampus, 60, taga Canjulao; ug Rosalino Abing, 63, taga Maribago, gibuhian sa samang adlaw human nakapiyansa matag usa og P36,000.

Sa usa ka pamahayag, gikompirmar sa CIDG 7 ang pagpagawas sa mga opisyal human nakapiyansa.

Ang kapitan sa barangay sa Bangkal nga si Cuizon, kaalyado ni Lapu-Lapu City Representative Paz Radaza, maoy ex-officio member sa Lapu-Lapu City Council isip presidente sa Association of Barangay Councils (ABC).

Niadtong Marso 15, 2022, gisang-at ni Chan ang counter-charge alang sa oral defamation batok sa pito ka mga barangay kapitan nga mipasaka kaniya ug sa 11 ka mga opisiyal sa city hall og malversation of public funds.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph