Pagbaha, ‘spag wires’ unang sulbaron ni Chan

Pagsulbad sa suliran sa baha nga giatubang sa mga barangay sa dakbayan sa Lapu-Lapu matag uwan maoy tutokan og una sa ikaduhang termino ni Mayor Junard “Ahong” Chan, kinsa napili sa dako kaayong mayoriya sa bag-ohay lang natapos nga lokal ug nasudnong eleksiyon.

Si Chan niingon nga mao kini ang una niyang gituki sa pagpakigtagbo sa tanang department heads sa Lunes sa buntag, Mayo 16, 2022.

Gimandoan sa mayor ang engineering department sa pagpangita og solusiyon sa drainage system ug outfall niini.

“Ato nang gimandoan ang atong Engineering Department nga hatagan og prayoridad ang pagsulbad niini kay di kita mosugot nga mabutang na pod sa alanganin ang kinabuhi sa atong mga kaigsuonan sa panahon nga moabot na ang ting-uwan,” matod ni Chan.

Human sa bagyong Odette (Rai) niadtong Disyembre 16, 2021, daghang mga poste sa kuryente ug telco ang nangatumba.

Bisan tuod kon nahuman na ang pagpang-ayo ug pag-instalar sa mga linya sa Mactan Electric Company (Meco) ug mga telco, daghan gihapong wires ang nangumbitay labina sa sudlunong mga dapit.

Gusto ni Chan nga panguhaon ang mao nga mga linya nga nakahasol sa iyang mga konstituente.

Ang mga kable ug linya sa kuryente nga nangumbitay sa mga karsada naghatag kini og kakuyaw sa mga motorista.

Matod sa mayor nga iyang ipatawag og tigom ang mga kompaniya nga nanag-iya niini.

“Taliwala sa atong panawagan sa mga kompanya nga limpyuhan wala gihapon kini nahatagan og aksyon maong ato silang ipatawag sa atong opisina para malimpyo na ang atong mga kadalanan,” dugang sa mayor.

Aron di na kini masubli matag human sa katalagman, nakahuna-huna siya nga magpasar og ordinansa niini.

Ang mao nga tinguha di na malisod alang kaniya tungod kay ilang giharos ang tanang 12 ka mga lingkuranan sa Konseho sa miaging piniliay.

“Magmugna sab kita og ordinansa nga mosulbad sa problema sa kadaghang mga kable sa mga poste o gitawag nato nga spaghetti wires kay peligro kini sa mga motorist,” nipasabot si Chan.

Patauran usab og mga suga ang kadalanan nga ngitngit panahon sa kagabhion.

Aksiyunan usab niya ang wa pagkooperar sa pipila ka mga barangay sa pagkolekta sa mga basura “para mahatagan og bati nga imahe ang atong administrasiyon ug makakuha sila og ikadaot nato atol sa eleksiyon.”

Iya usab nga gipasalig nga pang-ayuhon ang mga pasilidad nga nangadaut sa bagyong Odette (Rai) nga nakaapekto sa serbisyo sa kagamhanan.

Si Chan, sa miaging semana, nilatid sa iyang mga prayoridad sa unang 100 ka mga adlaw sa iyang termino.

Nag-una niini mao ang pagsulbad sa baha nga nagbalikbalik nang problema sa siyudad.

Iyang gitumbok ang drainage projects ni Kongresista Paz Radaza nga wa makasulbad sa baha kay way outfall kun lutsanan sa tubig.

Uban sa iyang asawa nga si Cindi King-Chan nga napili hulip kang Radaza sa Lapu-Lapu lone congressional district, ilang pangitaan og paagi ang pagmugna og outfall ug sewage treatment plant alang niini.

Si Radaza niangkon nga way outfall ang mga drainage system, apan gipatuman kini sa Dept. of Public Works and Highways (DPWH) kay temporaryo kining makasulbad sa suliran.

Laing hatagan og unang pagtagad ni Chan mao ang pag-aprobar sa P24.8 bilyunes nga skyway nga magkonektar sa Cebu-Cordova Link Expressway (CCLEX) ug Mactan Cebu International Airport (MCIA) nga makasulbad sa tipik sa suliran sa trapiko kay di na moagi sa kinapusoran sa siyudad ang mga sakyanan nga paingon sa tugpahanan.