Nakalabni na sab og laing gold medal si Filipino gymnast Carlos Yulo sa 31st Southeast Asian Games kagahapon, Mayo 16, 2022, sa Quan Ngua Sports Palace sa Hanoi, Vietnam.
Si Yulo nirehistro og 14.700 puntos aron patigbabawan ang men’s vault final aron langkaton ang iyang ikaupat nga gold medal sa matag duha ka mga tuig nga kompetisiyon.
Si Tikumporn Surintornta sa Thailand maoy midaog sa silver human kini nakatali og 14.250 samtang ang laing Thai nga si Juancho Besana (14.017) maoy miangkon sa bronze.
Sa iyang bahin, nikulit og kasaysayan ang laing Pinoy nga si Merwin Tan human niya natunolan pagbalik og gold medal ang Pilipinas sa men’s bowling singles event.
Mao kini ang labing unang bowling gold medal sa Pilipinas sa miaging 11 ka mga tuig.
Si Tan mitali og 1,292 aron patigbabawan ang laing 11 ka mga partisipante.
Miangkon sa silver medal ning maong event mao si Yannaphon Larpapharat sa Thailand (1,286) samtang si Ryan Leonard Lalisang sa Indonesia (1,221) maoy bronze winner.
Sa laing bahin, makadawat og cash incentives ang Pinoy nga mga atleta nga makalangkat og medalya sa matag duha ka mga tuig nga kompetisiyon.
Ang Philippine Sports Commission (PSC) magpagawas og labing minos P18 million nga pundo alang sa Republic Act 10699 nga gitawag sab og National Athletes and Coaches Incentives and Benefits Act.
Nakasaad ning maong balaod nga ang gold winner makabulsa og P300,000, makadawat og P150,000 ang silver medalist samtang P60,000 sa bronze medalist.
Ang coach makakuha og katunga nga kantidad sa maangkon sa medalist.
Ning pagsuwat, ang Pilipinas nakapundo na og 21-27-38 gold-silver-bronze medal tally.