Uban sa 67 ka barangay nga adunay zero transmission sa coronavirus disease 2019 (Covid-19) virus, si Konsehal Joel Garganera niingon nga ang alert level status sa dakbayan sa Sugbo nagsalamin kon giunsa pagdumala sa lokal nga kagamhanan ang pandemya.
Si Garganera, kinsa mao usab ang deputy chief implementer sa Emergency Operations Center (EOC), niingon nga Lunes, Mayo 16, 2022, nga ang mga kaso sa Covid-19 sa siyudad padayon nga nihubas bisan human sa 2022 national ug local elections niadtong Mayo 9.
“Our cases are decreasing, I do not believe and I do not buy the idea that cases will rise after the election,” matod ni Garganera.
Ang konsehal niingon nga bisan pa sa dinaghang panagtapok sa mga tawo nga gustong mobotar sa lainlaing polling centers sa dakbayan, ubos ang transmission sa virus sanglit nagsul-ob og face mask ang mga botante.
Gitug-an usab ni Garganera nga niadtong Mayo 15, ang EOC nakaila na sa 67 ka mga barangay nga walay gikatahong transmission sa maong virus.
Sa datos sa EOC, ang nahabilin nga mga barangay nga adunay aktibo nga kaso sa Covid-19 mao ang: Basak-Pardo, Mabolo, Tisa, Guadalupe, Camputhaw, Luz, Babag, Capitol Site, Inayawan, Kinasang-an Pardo, Lorega-San Miguel, Quiot, ug Labangon.
Bisan pa niini, giawhag gihapon ni Garganera ang publiko sa pagsunod sa minimum health protocols ug pagpahimulos sa libreng bakuna gikan sa kagamhanan sa dakbayan.
“Our cases reflect (the status of the pandemic). It says so that we are data-driven. (But) Covid-19 is still here... we should not be complacent. Let us be mindful gihapon,” matod ni Garganera.
Dugang ni Garganera nga ang pagpabilin sa alert level status sa dakbayan resulta usab sa taas nga porsiyento sa mga nabakunahan.
Ang vaccination drive nilapas na sa target nga populasiyon ug ang porsyento sa nabakunahan nga mga senior citizen sa dakbayan sa Sugbo maoy usa sa labing taas sa nasud, dugang niya.
Niadtong Mayo 15, gikan sa 467 ka na-testing nga mga indibidwal, duha lang ka bag-ong mga kaso ang na-detect nga nagdala sa daily positivity rate ngadto sa kasamtangang 0.43 percent.