Ang Department of Environment and Natural Resources (DENR) Environmental Management Bureau (EMB- Region 7) nipasalig nga ang mangrove farm sa Cansaga Bay dili maapektuhan sa katukoran sa Global City Mandaue kon ang reclamation work sugdan sa Septiyembre.
Si Cindylyn Pepito, Engineer IV Chief sa Environmental Education and Information Unit sa DENR EMB- Region 7, nitug-an sa Sunstar Cebu niadtong Lunes, Mayo 16, 2022, nga ang local government unit (LGU) sa Mandaue City nakig-alayon kanila subay sa pagtukod sa P20-bilyon nga proyekto sa Global City.
Dugang pa ni Pepito nga hangtod karon, ang LGU sa Mandaue nagtuman ug nakig-alayon sa DENR sa pagsiguro nga dili maapektuhan ang Mangrove Area duol sa dapit.
Ang LGU, matod niya, nisumiter sa supplemental requirements nga gikinahanglan sa DENR ug nahatagan og Environmental Compliance Certificate (ECC) sa regional office sa Sudlon, Lahug, Cebu City.
Ang ECC usa ka importante nga kinahanglanon nga giisyu sa DENR nga nagtugot sa usa ka gisugyot nga proyekto nga magpadayon sa sunod nga yugto sa pagplano ug makakuha og mga pagtugot gikan sa ubang mga ahensiya sa gobyerno ug LGU aron ang proyekto makasugod sa pagpatuman.
Kauban sa pag-aprobar sa ECC mao ang pagsumite sa Enviromental Impact Statement (EIS) screening checklist aron masiguro nga ang proyekto nakaagi og igo nga mga pagtuon kon nakapasar ba kini sa Environmental and Social Safeguards (ESS).
“So far, all the infrastructure projects these days are very conscious of the environmental impact. The LGUs already know their responsibility which is to make sure to have sustainable environmental management, and that’s the same thing for Mandaue,” dugang ni Pepito.
Dihang gipangutana kon ang proyekto posibleng hinungdan sa pagsaka sa lebel sa dagat sa Cansaga, si Pepito niingon nga wala pa silay gihimo nga pagtuon alang niini, apan nipasalig nga mohimo pa sila og dugang eksaminasiyon ug makig-alayon sa Mandaue LGU kon mahimo.
Gipasalig usab sa DENR nga regular nga bantayan ang proyekto sa pagsugod sa reclamation sa yuta niini sa Septiyembre ug sa tibuok proseso sa konstruksiyon aron masiguro nga ang proyekto sa Global City Mandaue makatuman sa tanang gikinahanglang environmental laws.
Ang Global City Mandaue project gikatakdang itukod sa 101 ka ektarya nga yuta duol sa Cansaga Bay subay sa Mactan Channel duol sa Marcelo Fernan Bridge.
Giingong kini ang labing unang waterfront city alang sa Mandaue City ug sa tibuok lalawigan sa Sugbo.