6 ka lungsod sa Cebu Alert Level 1 na

6 ka lungsod sa Cebu Alert Level 1 na

Human sa mas hugot nga quarantine classification tungod sa coronavirus disease (Covid-19), gipahibawo sa Inter-Agency Task Force for the Management of Infectious Disease (IATF-MEID) nga ubos na sa Alert level 1 ang unom ka mga lungsod sa Sugbo gikan sa Mayo 16-31, 2022.

Gilangkuban kini sa Alcoy, Borbon, Oslob, Santander, ug mga lungsod sa mga isla sa Camotes nga Tudela ug Pilar.

Samtang ang tri-cities sa Sugbo magpabilin usab sa Alert level 1 status.

Subay niini, ang nahabiling lugar sa probinsya sa Sugbo, lakip ang lalawigan sa Bohol ug Negros Oriental, magpabilin sa Alert Level 2.

Nalakip sa mga qualification aron ipaubos sa ubos nga alert level ang usa ka lugar mao ang ubos nga mga kaso sa Covid-19 ug ang taas nga vaccination rate sa senior citizens ug vulnerable sector sa usa ka LGU.

Ang mga lugar sa probinsya nga nagpabilin sa Alert level 2 sama sa dakbayan sa Naga, padayong mopatuman sa curfew ingon man ang pag limit sa kapasidad sa tapok.

Kini subay sa uwahing mando nga giluwatan ni Naga City Mayor Kristine Chiong sa mga konstituente niini.

Ang siyudad magpabilin sa naasoyng alert level sugod sa Mayo 16 hangtod sa Mayo 31, 2022.

Subay sa mando, giabisuhan ang tanan sa padayong pagpatuman sa guidelines ubos sa Memorandum No. 2022-24 nga giluwatan ni Chiong.

Gitugotan niini ang tanang kalihukan sa dakbayan gawas lang sa pagpahigayon og sugal.

Padayon usab ang pagpatuman sa carrying capacity.

Anaa sa 50% ang seating capacity alang sa anaa sa sirado nga lugar samtang 75% ra usab nga kapasidad ang gitugot alang sa outdoor venue.

Lakip sa guidelines nga sundon mao ang pagpanginahanglan og Mayor’s Special Permit alang sa mga religious processions, caravans, motorcades, mass gatherings sama sa fiesta ug mga street activities.

Gawas niini, padayon pa usab ang pagpatuman og curfew sa dakbayan nga magsugod alas 11:00 sa gabii hangtod sa alas 4:00 sa buntag.

Subay niini, giawhag gihapon ang tanan sa pagsunod sa health protocols ilabi na ang pagsul-ob og face masks aron malikay sa pagtakboy sa sakit.

Sa labing uwahing datos sa siyudad, wala na kini natala nga mga aktibong kaso sa Covid-19 apan nagpadayon ang pagpahigayon og bakuna niini ilabi na sa vulnerable sector sa siyudad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph