Stockholm, Sweden - Proklamasiyon na lang ang kuwang kay di na malalis nidaog ang mayor dakbayan sa Davao isip bise presidente sa Pilipinas sa milabayng piniliay niadtong Mayo 9 ug gitawag siya karon nga si presumptive Vice President Sara Duterte-Carpio.
Anaa na karon sa 98.3 porsiyento ang naproseso nga mga balota diin si Duterte nakakuha og 31,561,948 ka mga boto kun 61.29 porsiyento sa kinatibuk-an nga nakuha niyang suporta sa mga Filipino. Mas taas pa ang iyang botos nga nakuha kay ni presumptive President Ferdinand “Bongbong” Marcos Jr.
Ang naasoyng resulta maklaro nga hapit moabot sa tunga sa milyon sa mga botante nga dili si Bongbong ang ilang presidente apan si Duterte maoy ilang gipili nga bise presidente. Nagpasabot kini sa naghuwat nga dakong responsibilidad sa anak ni Presidente Rodrigo Duterte sulod sa unom ka tuig.
Gahuwat na si Sara nga iproklamar siya aron makasugod na siya sa iyang plano ug tinguha ning gisangon ni Bongbong kaniya nga mamuno sa Department of Education (DepEd). Alang sa umaabot nga ikaduhang labing dakong tahas sa kagamhanan sa Pilipinas ang pag-edukar sa kabataan maoy labing importante alang sa kauswagan ug kalambuan sa atong nasod.
Importante nga tutokan ni Duterte ang kalidad sa edukasiyon kay niadtong 2018 sa gihimong pagtuon sa Programme for International Student Assessment (PISA) sa 79 ka nasod, nahimutang ang Pilipinas sa katapusang bahin ilabina sa pagsabot sa gibasa, Math ug Science. Dako kaayo ning sagpa sa gobyerno nga matag tuig ang natad sa edukasiyon maoy anaay labing taas nga budget apan maglisod og sabot sa ilang gibasa ang atong mga tinun-an ug limitado ang ilang nakat-onan sa Science ug Math.
Angay sab susihon ni Duterte ang kondisiyon sa mga magtutudlo aron mamahimo silang epektibo sa ilang mga trabaho nga ning higayona gihatagan silang daghang responsibilidad gawas sa ilang pagtudlo nga naglisod na sa paghimong prayoridad sa pagtudlo sa mga bata. Susihon usab sa umaabot nga bise presidente ning paagi sa promosiyon sa DepEd nga gikan sa pagsud nila sa ahensiya hangtod karon Teacher 1 lang gihapon.
Gawas niini, umentuhan unta ang suweldo sa mga magtutudlo kay sila man ang nag-umol sa mga propesiyonal ning atong nasod. Ang uban natong mga magtutudlo tua na sa laing nasod kay mosobra sa P300,000 ang ilang suweldo matag buwan didto ug grabe kaayo ang suporta sa ilang propesiyon. (josephelvirtubilan@gmail.com)