Editoryal: Makapangasaba na

Editorial Cartoon by Ariel Itumay
Editorial Cartoon by Ariel Itumay

Kaniadto, malisod kaayo ipakita sa lokal nga mga opisiyal ang ilang performance kon di sila modangop sa tradisiyunal nga media. Kinahanglan silang mainterbyu sa radyo, telebisiyon ug newspaper.

Apan tungod sa internet, ang social media platforms gigamit na sa mga local government unit (LGU) isip paagi sa pagpahibawo sa ilang mga konstituente sa ilang mga programa ug gigama nga mga proyekto. Hapit tanang gibuhat sa mga opisiyal, bisan mga meeting nga may kalabutan sa mga kalihukan sa kagamhanan, gipang-post na sa social media.

Sa miaging eleksiyon, gigamit usab nga platform ang socmed sa mga kandidato. Nakabentaha ang mga incumbent tungod kay kanunay ang ilang presensiya ug dugay na nilang gihimo nga paagi sa pagpahibawo sa katawhan.

Naay uban nga mga local chief executive nga naghimo mismo og ilang socmed account apan gimintinar sa mga tawo nga dunay kahibawo kun talento sa pagmugna og content nga makadani sa publiko. Maghilak ang adlaw nga wa silay social media post kay bisan gani sa ilang mga pagkaon nga kuno maka relate ang mga kabos, ila mang ipakita.

Dinhi usab nakakuha og feedback ang mga opisiyal sa mga kakuwangan ug gusto sa iyang mga konstituente. Dunay ubang mga opisiyal nga nitubag kunohay, apan ang content writer diay ang gahimo sa tubag, apan dunay pagtugot sa hingtungdan.

Maayo baya ning social media kay bisan tuod di ang hingtungdang opisiyal ang tigsuwat ug tigtubag, apan iyang direktang matan-aw ang iyang account ug masayod sa unsay panginahanglan ug nag-unang suliran sa iyang katawhan.

Mahimo gani nga siya mismo ang direktang motubag sa mga isyu nga gimugna ug gipadangat sa mga netizen nga ubos sa iyang hurisdiksiyon. Ang nakaanindot usab sa social media kay mas mapugos ang mga opisiyal sa pag-aksiyon ug pag-alagad nga mas sihag itandi sa kaniadto.

Makapangasaba na gud ang mga tawo pinaagi sa social media.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph